Ka skul Mairung Heh Presbyterian LP bad UP ka dang donkam shibun ki jingïarap ban kyntiew ïa ka thaiñ Ri Bhoi

Shillong, Nailar 06: Ka kam ïalap kaba dei lyngba ka pule puthi ka long kaba kongsan bad kaba donkam bha ban pynbha ïa ka jingim jong ki briew ban ïa ka jingïoh pisa naba ka neh tang shipor bad kaba lah ban lut noh ha kano kano ka khyllipmat, ong u Co Chairman ka MIDC u Bah Ransom Sutnga haba kren kum u kongsan bad plie ruh ïa ka Food Fest Cum Sales of Works ha All Saints Hall Shillong ka prokram ba la pynlong da ka jingïaseng Samla CE Union Shillong Ri lum Presbytery, Social Welfare and Evangelistic Committee kum ka jingïarap pisa na ka bynta ka jingtei ïa ka Mairung Heh Presbyterian LP and UP school of JSCEUSRLP, Ri Bhoi District kaba dang donkam shibun ki lad jingïarap bad ki jingsynniang lem khnang ban lah ban kyntiew ïa ka thaiñ Ri Bhoi District baroh kawei.
Hadien ba u la nohsynniang da ka pisa sha kane ka skul ha kane ka prokram, u Bah Sutnga u la ïathuh ruh ba kum kiba ngeit jong ka Balang dei ban bud ïa ki nuksa U Jisu uba la ong ban leit ïalap sha satlak ka pyrthei ban ïarap ïa ki para briew.
U la Ïaroh ïa ki kam bakhraw ba la leh da ka jingïaseng Samla CE Union ban tei ïa ka skul sha Mairung Heh Presbyterian Church Ri Bhoi District ban kyntiew ïa ka bha ka miat jong ki nongshong shnong ka thaiñ bad pynpaw ruh ka jingkyrmen ba yn lah ban tei pyndep noh ïa katei ka skul kaba dang don bun ki jinglut bad jingnoh synniang babun na baroh ki liang.
La pynïaid ïa ka prokram da u Tbn W Kharlyngka, la pule sdang bad duwai da ka Kong G P Nongkhlaw, nangta ki Jingkyrkhu pynwai na u Rev. E R Tynsong Executive Secretary Shillong Ri lum Presbytery.
Ha kane ka prokram la die ïa ki jait jingbam babun jait, ki tiar ba shna da ki kti, ki jhur ki jhep, ki jaiñ ki nep bad kiwei kiwei ha kane ka prokram ba shi Sngi.
Haba phai sha ki lad jingïarap kiba ïadei bad kane ka kam ban kyntiew ïa ki kam skul sha kane ka thaiñ, ka la don ruh ka jingïathuh ba kane ka thaiñ ba don katei ka skul ka dang don bun ki shnong kiba ki nongshong shnong ki donkam ki lad jingïarap ha kiba bun ki liang bad halor kane ka jingdon bynta jong ka Balang Presbyterian ha ka ban leit sha kine ki thaiñ kiba don shisha ki lad jingïarap khamtam ha kaba ïadei bad ka jingdonkam ban kyntiew ïa ka pule puthi bad kumjuh ruh ïa ki kam jingngeit bad kumjuh ruh na ka bynta ka jingmyntoi bad na ka bynta ka bha ka miat lang jong ki nongshong shnong.
Lah ban ong ba ka jingdon jong ka skul UP bad LP ha Mairung Heh ba la pynïaid da ka Presbyterian Church, kan long ka jingmyntoi kaba khraw ïa ki nongshong shnong kiba don ha kane ka thaiñ Ri Bhoi District, khamtam kito ki longïing kiba tlot ka ïoh ka kot bad ki bym kot bor ba kin wan ne leit pule shaduh Shillong ha ki skul bapher bapher.