Ka sien ba nyngkong ha WKH ban leit lang tang kawei ka kynhun: G.J.L Sangriang

Nongstoiñ, Kyllalyngkot 08: Ha ka lah sngi u Blei, ka Coordination Committee of West Khasi Hills District for 5th Meghalaya Game 2023-24, ka la pynlong ïa ka jingïakynduh lang ha TRYSEM Hall ha ophis jong u Deputy Commissioner, kum shi bynta ban ai khublei sha baroh ki rang bad thei ïalehkai ka District sha ka 5th Meghalaya Game.
Ïa katei ka jingïakynduh lang la pynïaid da u Dr.L Mawsor ha ryngkat ka jingdonlang jong u bah Garod L.S.N Dykes IAS Deputy Commissioner u ba dei u Chairman ka Committee. Kiwei ki kynthup u Bah G.J.L Sangriang Chef de Mission, u Bah A.Nongrem Assistant CDM, ka kong D.Syiem DSO kaba dei ka Vice Chairman jong ka Committee bad ki athletes na ki khatwei tylli ki kynhun ïalehkai ki ban sa leit ban ïa shim bynta ha ka Meghalaya Game ka ban long ha ka nongbah Tura, naduh ka 15 Tarik mynta u bnai.
Ha katei ka jingïakynduh lang la pynsngew nyngkong ïa ki kynhun ïalehkai da u Dr L.Mawsor. Nalor kata la ïoh ïa ka jingpynshai na u Bah G.J.L Sangriang ha kaba ïadei bad ka jingleit ïashim bynta. U bah Sangriang haba pynshai sha ki nongïashim bynta ki ban sa leit mihkhmat napoh ka District, u la ong ba ka long kaei kaei kaba sngew tynnad, namar ka dang dei ka sien ba nyngkong eh ba ki kynhun kiba leit mihkhmat sha ki lympung ïalehkai bapher bapher kin ïoh ban ïaleit lang da ka kynhun ym shuh da ki synjuk shimet.
Ha kajuh ka por u la bynrap ba ka jingleit ïashim bynta ha katei ka lympung ïalehkai kaba heh, ka dei kaba la pynbeit ryntih da ka Meghalaya State Olympic Association ha kaba ka MSOA ka la pynbeit thik pa thik ïa ki tarik ba ki kynhun ki dei ban ïashim bynta.
Na ka liang ka Committee ka da sngew kmen eh bad ka phah ruh ïa ka jingai khublei sha ki 183 ngut ki rang bad thei ïalehkai na ki 11 synjuk bapher bapher, ba kin ïalehkai bha katkum ki discipline bad ban wanrah ïa ka nam ka burom ïa ka District.
Hadien ka jingpynshai jong u CDM la ïoh ïa ka jingpynshai na ka kong B.Syiem District Sport Officer West Khasi Hills, ha kaba ka long ba ki kynhun ïalehkai ki dei ban ïa tylli bad ïa ai mynsiem lang kawei ka kynuhun ïa kawei pat, khnang ba ki ïoh mynsiem bad wanrah ïa ka nam ka burom na ka bynta ka District baroh kawei.
U Bah Garod L.D.N Dykes IAS Deputy Commissioner u ba dei ruh u Chairman ka Committee, haba ai jingkren sha ki kynhun ïalehkai u la kynthup ïa ki ba haba ki leit ban ïashim bynta ha katei ka lympung ïalehkai, kim dei ban don ka jingsngewïapher jaitbynriew ne jingsngewïapher shnong ne jaka, hynrei ki dei ban don ka jingsngew ryngkat kyrdan bad ïa sngew kum shi para.
Nalor kata u la ong ba haba ki ïashim bynta ha ki jingïalehkai bapher bapher kim dei ban sngew rit mynsiem, hynrei ki dei ban don ïa ka thong ba ki pynpoi sha ka jingjop khnang ba kin wan rah ïa ja nam na ka bynta ka District.
Na ka liang ki nongïalam jong ki kynhun ïalehkai bapher bapher ki la pynpaw ïa ka jingsngew nguh kaba khraw ïa u Deputy Commissioner, u ba la shim ïa kane ka sien jam ban ïa don bynta lang ha kaba kyrshan ïa ki samla ïalehkai jong ka district, ha kaba kum kane ka por.
Ha katei ka jingïalang la pynsngew ruh ba ha ka 12 tarik kan don ka jingrah ïa ka dong musa ka ban sdang na Anderson Higher Secondary School haduh NRL petrol pump Nondeiñ, ha kaba san phew ngut ki nongïalehkai na ki kynhun bapher bapher kin ïa shim bynta ban rah ïa katei ka dong musa.