Shillong, Nohprah, 15: U Myntri ka Sorkar Jylla u Bah AL Hek ha ka sngi Palei u la ong ka rai ban ïakhun ïa ka elekshon Lok Sabha ka ban sa long ka shong ha ki nongïalam bahalor jong ka Party.
Kane ka jingkren jong u Bah Hek, la un ïakhun lane um ïakhun ïa ka elekshon Lok Sabha ka long hadien ba dang shen u la ai jingmut ïa ka Party ban pynieng da ki kynthei ha kane ka elekshon na Shillong bad Tura Parliamentary Seat.
“Ka jingkylli kaba mih ba ngan ym ïakhun kam don. Ka dei tang ka jingai jingmut ba ka party kan ïoh ïa ki kyrtong kiba biang,” ong u Bah AL Hek uba la long ruh u MLA la san sien kynthih na Pynthorumkhrah Constituency ha ka jingïakren bad ki lad pathai khubor.
“Kum kata ka rai (ban ïakhun ne ym ïakhun) ka shong ha ki nongïalam bahalor. Lada ki nongïalam ki ong, A,B ne C (ban ïakhun) ngi hap ban trei shitom ban pynthikna ba ka BJP kan jop ïa ka elekshon,” u la ong.
U Bah Hek u la ong ba u pynpaw ïa ka jingtyrwa jong u shimet ba kan long kaba biang palat ïa ka BJP lada ka pynieng kyrtong da ki kyntei na Shillong bad Tura. “Ka jingmut jong nga, ka long da kaba pynshong nongrim ïa ka bhah kaba 33% ïa ki kynthei,” u la bynrap.
Shuh shuh u Bah Hek u la ong ba ka jingtyrwa jong u kam don jingïadei eiei bad kiwei kiwei ki seng saiñpyrthei haba kylli, la ka jingai jingmut ban pynieng da ki kynthei ka long ban ïakhun pyrshah ïa ka rai jong ka National People’s Party (NPP), kaba la pynieng da ki kyrtong kynthei ba kynthup ïa ka Dr. Ampareen Lyngdoh kaba long ka Myntri Sorkar bad ka Agatha K Sangma kaba long ka MP ba mynta na ka bynta ka Shillong bad ka Tura Parliamentary Seat.
Haba kylli, u Bah Hek u la ong ba u shu ïohi tang ha ki lad pathai khubor ba ka Kong Fenela Lyngdoh Nonglait, ka bym dei ka dkhot jong ka BJP, ka la pynsngew sha ka Party ban pan tiket na ka bynta ka Shillong seat.
“Nga la ïohi ha ka kotkhubor hynrei ngam pat ïakren eiei halor kane ka kam bad u State President,” ula ong haba bynrap ba ki nongpan tiket kin hap ban pynrung dkhot shwa ïa lade bad ka BJP.
Ha kajuh ka por, u Bah Hek u la kyntu ïa ka BJP ba kan pynbna noh ïa ki kyrtong na ka bynta ka Shillong bad ka Tura namarba ka sah sa tang saw bnai ba ka elekshon Lok Sabha kan sa long shen.
“Nga kubur ïa kaei kaba phi ong. Lada ka BJP ka pynieng kyrtong na Shillong bad Tura, ki dei ban pynbna noh kham kloi bad kim dei ban ap haduh ka khyllipmat bakhatduh bad ki dei ban pynbna noh marmar, kata, saw bnai shwa ka elekshon,” u la ong.
“Nga la kyrpad ïa u State President ban khot jingïalang bad ban shim ïa ka rai, ngi hap ban phah ïa ka kaiphod jong ka jingïalang sha ka Party ba ngin sei kyrtong na Shillong bad Tura, ngi dei ban pynbna kyrtong shwa ka elekshon, ym ban ap haduh ka khyllipmat bakhatduh,” u la bynrap.
