Ka shnong Mutong bad ka shnong Rangad ha EJHD, ki shnong kiba bun bha ki kshaid kiba ba itynnad

Khliehriat, Naiwieng 11: Ka shnong Rangad bad ka shnong Mutong kiba dei ki shnong kiba paw bha ha ka kam jngohkai pyrthei, ha East Jaiñtia Hills District, lah ruh ban ong ba ki dei ki shnong kiba don bun tylli bha ki kshaid kiba itynnad kiba ju khring ia ki nong jngohkai pyrthei, ki bor pynïaid shnong jong ka shnong Rangad bad jong ka shnong Mutong ruh lem bad ki paidbah ki khmihlynti ba kine ki kshaid kin khring shuh shuh ïa ki nongwan jngohkai pyrthei na kylleng ki jaka.
Kine ki shnong ki la i donkam bha ban ïoh ruh ïa ka jingkyrshan bad ki jingïarap bad jingïatreilang na ka liang ka tnat sorkar (Tourism) khnang ban dup lah ban kyntiew stet ïa kane ka kam jngohkai pyrthei ha kine ki shnong, ba kan long ruh kum ka lad ïohkam ïohjam ïa ki paidbah jong kitei ki shnong.
Kumba baroh ngi tip ba ka East Jaiñtia Hills District ka dang don mynta hapdeng ka jingïaid lynti ban kyntiew shuh shuh ïa ka kam jngohkai pyrthei ha kaba ka District Mineral Funding Trust, ka tnat Basin, Fisheries bad kiwei kiwei ki tnat ki la pyntrei bun tylli ki project kiba radbah ha ki shnong ki thaw ban kyntiew ïa ka kam jngohkai pyrthei hapoh ka district, khmih lynti ba ka tnat jngohkai pyrthei (Tourism) ruh kan shim lem ia ka bynta ban kyntiew ia ka kam jngohkai pyrthei ha kane ka district..
Ha kaba ïadei bad ka jingdon ki kshaid ha kitei ki shnong, kaba long katkum ka jinglum jingtip ba la ïoh lum da u Mawphor, ki don haduh kumba san tylli tam ki kshaid ha ka shnong Rangad bad san tylli tam ha shnong Mutong, u Waheh Shnong jong ka shnong Rangad, u bah Damon Lamo u la ong ba ki dang don shuh nalor kine san tylli ruh kiba u Waheh Shnong ruh u dang wad bad tih bniah ban ïoh lum lut ïa ki kyrteng jong ki kshaid kiba don hapoh shnong , kat haduh mynta, ki kshaid kiba la ïoh lum kyrteng ki kynthup ka kshaid Umbyrleiñ, ka kshaid Lakyrding, kshaid Siej Tymmen, kshaid Tdem bad ka kshaid Tangnoob, kine ki dei ki kshaid kiba heh kiba don hapdeng ka mariang kaba ithiang ha shnong Rangad.
Kiwei kiwei pat ki kshaid kiba don ha shnong Mutong, East Jaiñtia Hills, ki kynthup ka kshaid Shad-dakha, kshaid Moopun, Synrang tyngkong, kshaid Synrang u Jop, kshaid Wah Umtong bad kiwei kiwei.
Katkum ka jingïathuh u Waheh Shnong barim jong ka Mutong, u bah Helping Phawa, la ong ba ka khana pateng ka ïathuh ba ha ki por mynshwa ki dohkha kiba poi ha kane ka thwei kaba don ha trai jong ka kshaid Shad-dakha kim ju lait shuh ban leit shano shano hynrei ki la shu sahkut beit ha kane ka jaka bad ka jingsahkut ki dohkha ka pynlong ïa ki dohkha ba ki shad kynting shalor teng teng ban bam lyer, kane ka kshaid ka don ha shnong Mutong bad kiwei kiwei pat ki kshaid kiba don ha Mutong ki kynthup ka kshaid Moopun, la jer kyrteng ïa kane da ka kshaid Moopun namar ha kane ka jaka ba don ka kshaid u don uwei u maw uba la pynlong hi da ka mariang uba pun lynti kum ka jingkieng na shiliang sha shiliang, ka don ruh ka kshaid Synrang tyngkong, Kshaid Wah Umtong, kshaid Synrang-u-Jop bad kiwei kiwei.
Sngewtynnad ruh ban tip ruh ba ki Dorbar Shnong jong kitei ki shnong (Shnong Mutong bad shnong Rangad), ki ju shim khia bha ban pynneh pynsah ïa ka mei mariang, ban pynlong ïa ka mariang kaba kup rong jyrngam bad kumjuh ruh ki ju ïaleh ban pynneh pynsah ruh ïa ka khuid ka suba, man la ka por ki ju pynlut da ka pisa shnong bad syniang pisa para nongshongshnong katba ki lah na ka bynta ban pynitynnad ïa ki shnong bad ki la pynbit pynbiang katba lah ban pynneh pynsah bad pynwandur ne pynbit pynbiang ïa ki jaka kiba itynnad, ha kajuh ka por ki don ruh ka jingthmu ym tang ban pynneh pynsah ïa ka mariang kaba kup rong jyrngam, hynrei ban kyntiew ruh ïa ka kam jngohkai pyrthei ha ki shnong jong ki bad khmih lynti ruh ba kane ka long kawei na ki lad iohkam iohjam jong ki paidbah nongshong shnong.