Shillong, Nailur, 06: Ka Shillong Club Ltd kaba la pynïaid da ki bar jylla kam don stia ïa ka laisen khaii na ka Khasi Hills Autonomous District Council (KHADC) katkum ka Trading by Non-tribal Regulation 1954.
“Naduh u snem 1924 la aiwai ïa ka Golf Course sha ki bar jylla. Kaba sngew lyngngoh ka long ba la aiwai khlem buh por (perpetual lease) kaba la long kumba kane ka jaka ka ladei jong ki bar jylla lane la pynïaid da ki bar jylla haduh kine ki sngi bad mynta ngi ïohi ba ka la don ka jinglum ïa ka bai rung (Entry Fee) na ki Khasi kiba wankai ha kane ka jaka kaba la poi da ki lak shi taiew,” ong ka KHNAM lyngba u kyrrwoh ba la phah da u Vice President u Bah Thomas Passah.
“Kum ka seng ngim sngewïahap ba u bar jylla un pynïaid ïa ka khyndew ka shyiap u Khasi bad ban shim pisa kylla na ki Khasi hi,” bynrap u kyrwoh.
“Ki lai tylli ki Dorbar shnong kiba don ha kane ka thaiñ ki dei ban shimkhia ïa kane ka kam ban khanglad ïa ka jinglong trai ki bar jylla ïa ka Golf Course. Kan long ei ka jingkyrkhu lada yn aiti ban pynïaid da ki samla Khasi kiba la tbit lyngba ki Self Help Group,” bynrap u kyrwoh.
“Ngi dawa jur ïa ka KHADC ba kan shimkhia kum ïa kine ki briew kiba pynkhieñ ïa ki aiñ ka Council,” ong shuh shuh u kyrwoh.
