Ka Search Committee ka leh la ka bynta ban wad ïa ki dkhot ka Expert Committee : Ampareen

Shillong, Jylliew 27: Ka Nongaiktien jong ka Sorkar Jylla ka Kong Ampareen Lyngdoh, ha ka sngi Ba-ar, ka la ong ka Search Committee ba la thung da ka sorkar jylla na bynta ban wad ïa ki dkhot na bynta ka Expart Committe ban pynkylla ïa ka Reservation Policy ka la leh ïa la ka kamram.
“Ngi dang don ha ka lynti ban wad ïa ki dkhot kiba kloi ban khlieh ne ban long ki dkhot ha kane ka Expert Committee ba la thung da ka sorkar na bynta ban pynkylla ïa ka Reservation Policy. Ki kam ki jam ki la ïaid shakhmat bad ngi donkam ban ai por ïa ka search committee khnang ba kano kano ka sinejam ba ki shhim na bynta kane ka kam kan long ha ka lynti kaba dei bad kaba biang”, ong ka Kong Ampareen haba ïakren bad ki nongthoh khubor.
Ka la ong ba ka sorkar kam kwah ban shu leh kyrkieh ïa kane ka kam namar ba katei ka mat ka long kaba khia bha.
“Ngi hap ban long kiba peitngor bad ngin ïa ap watla ngi sngewthuh ba ka don ka jingpynbor hynrei ngin ym leh kyrkieh ïa kano kano ka kam kaba khia bha kaba don ïa kiba bun ki bynta kiba ïadei bad ka aiñ ka kanun bad ngim kwah ban kren eiei kaban long kaba bakla ha kum kane ka por kaba mynta” ong ka Kong Ampareen.
Ka la ong ba kane ka Expert Committe kan wanrah jingshai ïa ki hajar tylli ki jingkylli kiba ïadei bad kane ka mat.
“Ki dkhot jong ka expert committee kin hap ban jubab ïa ki jingkylli bad ïa ka ishu kaba mih, kiba dei ki jingkylli kiba la buh da ki kynhun bapher bad ki riewshimet ha ka imlang sahlang” ka la ong.
Ha kaba ïadei bad ka jingkynnoh ki seng saiñ pyrthei bad ki sengbhalang ba ka Office Memorandum kaba thymmai halor ka Reservation Roster kaba la pynmih haka 14 tarik u Jylliew kadei kaba dap da ki jingklumar bad kam long kaba shai kdar ba ïa ka Roster yn pyntreikam da kaba kyrtiang dien ne nangne shakhmat, ka Kong Ampareen ka la ong ha kaba ïadei bad ka jingpyntreikam ïa ka Roster la dep ban buh ïa kawei ka committee.
“Ka KHNAM ka la phah ïa kawei ka shithi, nga lah dep pynshai biang ba ki don ki bynta jong ka jingpynwan ïa ki kyntien kiba la pyndonkam da ka sorkar ha ka jingpynbna ka lah ban ym long kaba ïahap bad ki katto katne ki kyntien kaba ki kwah ïa ngi ban ngin pyndonkam” ong ka Kong Ampareen.
Hynrei ha ka jinglong jingman, ha ka jingthoh bad jingpyntreikam, ka Roster kan ai jingshakri ha kaban pyntreikam ïa ka ka rukom leh kaba la ïaid mynta ha ka jylla Meghalaya naduh u snem 1972. Ka jinglong jingman bad ka jingleh kan dei kaba bud ryntih kumba la ju leh.
Ka Kong Ampareen kaba long ruh ka Myntri Sorkar ka la ïathuh ba ka Committee jong ki seng saiñ pyrthei halor ka Roster kan sa shim ïa ka rai la kin dang bteng ban pynlong ïa ka jingïalang.
“Ngim pat shim ïa kano kano ka rai halor katei. Ngi dang ap ïa baroh ki seng saiñ pyrthei ba kin phah ïa ki jingpynsngew ki jongki” ong ka Kong Ampareen bad ka ong, ba haduh mynta ka Committee kam shym la ïoh ban lum ïa ka jingïalang namar kiba bun ki seng saiñ pyrthei kim shym la aiti ïa kino kino ki jingthoh hynrei tang kawei ka seng saiñ pyrthei ka la phah ïa ka jingthoh ha kaba ïadei bad ka jingpyndonkam ïa kawei ka kyntien ha ka Roster.
Ha kaba ïadei bad ka jingdawa kiwei pat ki riewlum kiba don hapoh ka jylla ban bhah lem ïa ki 15% ha ka Job Reservation Policy, ka Myntri Sorkar ka la ong, “Ngi lah ïakynduh ban ïa kren ïa kane ka kam bad u Myntri Rangbah, ha kaba kiwei pat ki riewlum ka jylla ha ka taiew ba la dep bad ngi la pynpaw ha ki ba kidei ban phah da ki jingthoh baroh ïa ka jingsngew bad ïa ka jinglap ka jongki bad dei kane ka Expert Committe kaban shim ïa ka rai”.