Ka SCF ka dei ka seng aiu, kam long beaiñ ba ka phah khang dukan ? Kylli ka HITO na ka DC

Shillong, Ïaïong 27: Ka Hynñiewtrep Integrated Territorial Organization (HITO) ha ka sngi U Blei ka la dawa na ki bor pynïaid district ka East Khasi Hills ban pynshitom da ka aiñ pyrshah ïa ka Shillong Citizen’s Forum (SCF) kaba la phah khang ïa baroh ki dukan kiba don ha nongbah Shillong ha ka 28 tarik mynta u bnai, kum ka dak ka jingïadon bynta lang bad ki lanot kiba la shah siat ïap ha ki lehnoh ha Pahalgam.
Ha ka shithi ba la phah sha ka deputy commissioner ka Kong RM Kurbah, ka HITO ka la ong, “Madam, ngi kwah ban tip kumno ka aiñ ka ïeng halor kane ka seng kaba la khot da ka Shillong Citizen’s Forum? Hato kadei ka seng kaba register? Kiei kita ki nongkitkam jong ka bad ki dkhot? Katkum ki jingtip ba la ïoh, la iathuh ba ka dei kaba la pynïaid da ki nongkhaiï kiba na Police Bazaar, kiba sah nyngkong ha Kolkata bad na shajngai ki la pynïaid ïa ki kam lyngba katto katne ki briew. Kane ka buh ka jingkylli kaba heh bha shaphang ka jinglong ba shisha, ka jinglong hok bad ka jingaiti jong ka forum na ka bynta ka bha ka miat jong ki briew jong ngi.”
“Ka HITO ka kwah ban ong ba kano kano ka jingpyrshang ban pynbor ban phah khang ïa ki dukan, kaba ïalam sha ka jingpynthut ïa ka shongsuk shongsaiñ kane kan dei hapoh ka jingkhmih jong ki bor pynïaid district. Ngi dawa ba kiba noh synniang bad kiba pyntreikam ïa kane kaba ki khot ka jingphah khang dukan kim ïapher shuh na kiwei pat ki sengbhalang kiba shait pynkheiñ ïa ka aiñ, kumta dei ban shim da ka kam kaba tyngeh lyngba ka aiñ kaba kynthup ka jingset patok kaba dei ban sdang khlem da pynslem,” ka la bynrap.
Na ka liang ka HITO haba pynpaw ïa ka jingsngewsih ïa ki longïing kiba la ngat ha kane ka jingjia bad ban pynpaw ba ka la duwai na ka bynta jong ki bad kumjuh ruh ba kito kiba mynsaw kin ïoh noh ka jingkoit jingkhiah, ka la ong, “Ka jingïadonlang kaba shisha ka dei ban wan da ka mon sngewbha jong ki paidbah, ym da kaba khot phah khang dukan”.
“Kum ban pynkynmaw haba ki briew jong ngi ki la shah siat ïap ha ki pulit ka Assam ha shnong Mukroh, wat hadpeng ka jingkhot pakhang shnong da kito ki kynhun ba kwah myntoi shimet, na ka liang ka HITO pat ka la kyntu ïa baroh ki dukan ba kin plie, naba kane ka ktah ïa ka kamai kajih jong kiba bun bad kaba ym lah ban ïapeiñ. Ym don na ki riew shimet ne ka kynhun kaba lah ban don ka bor da ka aiñ ban pynduh ïa ka hok ki nongshong shnong ban kamai jakpoh halor kano kano ka rukom,” ka la bynrap.