Shillong, Nailur 03: Ka Sankardev College ka la rakhe ïa ka lyngkhuh dap snem kaba 62 ha ka 2 tarik u Nailur 2024 bad ha kane ka sngi ka la pynlong ruh ïa ka Graduation Day na ka bynta ki samla pule kiba dang shu pass ïa ki Degree jong kane ka College. U MP badonburom jong ka Lok Sabha u Dr. Ricky A. J. Syngkon u la donlang ha kane ka sngi kum u Kongsan.
U Kongsan u la ai ruh ïa ka khusnam Academic Award of Excellence sha ka Badaker Nongneng Daloi, u Basynran Wanshnong, u Bansharai Pius Kharmawshun kiba la ïoh ïa ka kyrdan kaba 1, 3 bad 5 ha ka subject Khasi bad ïa ka Barrymore Nongsiej kaba la ïoh ïa ka kyrdan kaba 4 ha ka subject Chemistry ba la pynlong da ka NEHU.
U Kongsan u la pyllait paidbah ruh ïa ka wadbniah ba la pynmih da ka Department Political Science kaba la ai kyrteng “Meghalaya Assembly Election 2023: Issues, Agendas and Commitments of Political Parties” bad ka Department Khasi, kata “Ka Wadbniah halor ki Jingrwai Khasi kiba Kren Shaphang ka Mariang bad ka Sawdong Sawkun: Ka Saiñpyrkhat U Khasi kaba ïasnoh bad ka Mariang bad kumno ban Pynneh Pynsah ne Tyngkai ïa Ka.”
U Dr. Ricky A. J. Syngkon ha ka jingkren jong u, u la ïaroh ïa ka jingtrei shitom jong ka College ha kaba shim ïa kiba bun ki sienjam kiba kongsan bad kiba thymmai, ha kaba ïadei bad ka jinglong bad ka jingkiew shaphrang jong kane ka jaka pule. U la ai ka jingïaroh ïa I Principal iba don ka saiñdur ban kyntiew ïa ka college bad kumjuh ruh ïa ka jingtrei shitom jong baroh ki nonghikai ha kaban ai ïa ka jingshakri ba kordor jong ki ïa ki samla pule bad ïa ka imlang sahlang. U la ai khublei bad ai mynsiem ïa ki samla pule ba kin trei shitom, ba kin long kiba ïaishah bad ban aiti lut ha ka kam bad kaba kongsan eh, ban long ki briew kiba bha.
Baroh ki don 153 ngut ki samla pule kiba la pass ha ki eksamin Bachelor of Arts bad Science la ai da ki momentos.
U Vice Principal ka College u Bah K. Chyne u la ai ka jingkren pdiang burom. Hadien kane la bud sa ka jingpyni video kaba la buh jingthoh ïa ka jingïaid lynti jong ka College ha kine ki 62 snem kiba la leit kaba pynpaw ïa ka histori jong ka naduh ba la sdang ïa ka bad ïa ki kam bapher bapher ba la pynlong da ka college, ha ka pule puthi bad ki bym dei ha ka pule puthi. Ka Principal ka College ka Dr. Eureka.F. P. Lyngdoh, ha ka jingkren jong ka, ka la ai khublei ïa ki samla pule kiba la wanrah nam ïa ka College.
Ha kane ka sngi la ïa donlang ruh u President bad ki dkhot ka Governing Body bad ki samla pule jong katei ka college. U Bah Manbor S. Warjri uba dei u Coordinator jong ka IQAC u la ai ïa ka jingkren ai khublei bad ka Kong M. Umdor kaba dei ka Associate Professor jong ka tnad Botany ka la pynïaid ïa kane ka prokram.
