Shillong, Nailur 03: Ki paidbah Nongshong Shnong jong ka thaiñ South West Khasi Hills District kylleng sawdong jong ki Shnong bapher bapher hapoh ka District ki la pynbeit da ka jingïalang paidbah hapoh ka Shnong Mawkyrwat ha ka 31 tarik mynta u Bnai Nailar (August), khamtam ha kaba ïadei bad ki Longïing Longsem kiba duk ba kyrduh kiba la wan ban mih shakhmat bad ban pynsngew halor ki jingeh kiba bun kumba ki la ïakynduh manla ki por tang namar ka jingbym kwah jong ki ban pyndonkam ïa u AADHAAR hapdeng ka jingim shimet ka jong ki.
Manla iwei pa iwei kum ki Nongshong Shnong kiba long ruh ki trai shnong napoh katei ka thaiñ ynda hadien ba ki la poi hapdeng ka jingïalang ki la pynpaw naduh ki longkmie longkpa kumjuh ruh haduh ki riew tymmen riewsan ban pynsngew halor ka jingshah ban beiñ ka jong ki kum ki Trai Ri kiba la pynpaw ba kim lah shuh ban ïoh pdiang ïa ki jingïarap lyngba ka Sorkar jylla kiba long ki jingdonkam jong ki ba manla ka sngi kynthup naduh u khaw rashon, ka bainong sngi lyngba ka jingtrei bylla 100 (Shispah) Sngi jong ka MGNREGS, ka jingshah lum pisa hapoh ki Hospital Sorkar, ka jingshah beh kam ba la ai lyngba ka sorkar kum kiba trei Nurse bad kumjuh kiba trei hapoh ICDS, ka jingshah pynduh kiba duk kiba dei ban ïoh ïa ka skhim longïing shimet, ka jingduh noh ïa ka Pisa kynshew shimet kaba ki la thep hapoh ki Bank bapher bapher bad kumjuh kaba la ktah ïa ki khynnah Skul kiba la shah beh napoh skul bad ban duh noh shisyndon ïa ka pule puthi tang namar ka jingbymdon ïa u Aadhaar.
Ha katei ka sngi na ka liang jong ki paidbah napoh katei ka district jong ka Jylla Meghalaya ki la khot la ïawer ïa ki nongïalam jong ka kynhun MEGHALAYA AWAKEN CONCERN CITIZENS (MACC) kaba la ïaid da jingïeng rangbah lyngba ka Awaken India Movement (AIM) ban don ryngkatlang hapoh katei ka jingïalang ha kaba ki paidbah ki donkam ban pynsngew ïa ka jingshem jingeh kumba ki la ïakynduh ha kine ki sngi ba mynta.
Na ka liang jong ki nongïalam ba halor ka High Elevated Council (HEC), Central Body jong ka kynhun MEGHALAYA AWAKEN CONCERN CITIZENS (MACC) ki la leit ban synran da jingai mynsiem ïa ki paidbah shapoh katei ka thaiñ bad kumjuh ka kynhun kaba long ka Seng Kmie hadien ba la sakhi ïa kitei ki jingjia baroh ka la shim ruh ïa ka rai da kaba thaw noh shisyndon ïa ka MEGHALAYA AWAKEN CONCERN CITIZENS (MACC) District Level da kaba la pynkhamti halor ki Trai Shnong napoh katei ka district kiba long ki Para Ri napoh katei ka thaiñ kiba la shimti kum ki nongïalam ka MEGHALAYA AWAKEN CONCERN CITIZENS (MACC) South West Khasi Hills District ban mih shakhmat da jingsynran paidbah khamtam ha kaba ïadei bad kiba bun ki jingeh kumba ki paidbah ki shem bad ïakynduh na ka por sha ka por da kaba mih shakhmat bad shimkhia bad ïeng rangbah da jingïatreilang khlem da kynran dien kum ki briew kiba sngewthuh bad shemphang ha la ka jong ka Jylla.
Ki nongkitkam hapoh katei ka District la jied ïa ki trai ri napoh Mawkyrwat, Mawkohphet, Rangthong, Mawten, Mawpon, Manad lem bad kiwei kiwei ki Shnong kiba dei napoh South West Khasi Hills District (SWKHD).
Da jingïatylli kum ki briew napoh la ka jong ka Jylla ha ka ban treimon sngewbha ki la shim ruh ïa ka rai ban ïaid paidbah da ka Movement kaba la don lypa hapoh ka Jylla Meghalaya kumjuh ha kylleng sawdong jong ka Ri India kaba la tip kum ka Awaken India movement (AIM) ha ka ban ïeng ïada halor katei ka mat kaba ki paidbah nongshong shnong ki ïakynduh da jingeh bad shah ñiew beiñ ha la ki jong ki Trai Ri kiba long ki Nongtreikam Sorkar.
Halor kine ki jingjia bun na ki nongtreikam Shnong kam Hima Sima bad kumjuh ruh haduh ki MLA, MDC ki la hap ban shu peitkai manla ka por napoh ka Jylla la jong ki bym kheiñ dor ïa ki paidbah haduh ba la ktah jur ïa kiba bun balang khamtam ha kaba kum ki paidbah ki pyrshang ban ïeng ïada katkum ka hok ïa la ka jong ka jingim da jinglaitluid lyngba ka jingbym kwah jong ki ban pyndonkam ïa u Aadhaar.
U Bah Banshai Marbaniang uba long u President jong ka kynhun MEGHALAYA AWAKEN CONCERN CITIZENS (MACC) Central Body bad kumjuh uba bat ruh ïa ka kyrdan kum u Chairman jong ka Awaken India Movement (AIM) Meghalaya State la hap ban shim ïa ka rai ha ryngkatlang bad ki para dkhot lem bad ki paidbah ha kaba ïadei ban mih shakhmat bad ban pynlong noh ïa ka jingïalang paidbah hapoh nongbah Shillong da jingïawer ïa ki paidbah kylleng sawdong ka Jylla ki ban mih shakhmat ha ka ban ïeng ban ïada ïa la ka jong ka jingim halor ka jinglaitluid katkum ka hok bad jingshisha kumba kadei ban long.
Ka Awaken India Movement (AIM) kaba long ka movement jong ki paidbah ka Jylla lyngba u Chairman yn sa pyntip paidbah ha kano ka sngi kaba biang ban pynlong ïa ka jingïalang hapoh Shillong bad ka ban long ka sngi kaba kum ki paidbah kidei ban pynpaw da jinglaitluid na bynta ka lawei jongka Ri bad ka jaidbynriew ha kaba ïadei kumno ban ïeng rasong katkum ka Riti Synshar paidbah jong ka Ri India junom la junom.
Ki paidbah jong ka Jylla Meghalaya ki dei ban shimkhia ïa ka rai kylleng sawdong ka Jylla da jingïeng rangbah kum ki Trai Ri ban ïeng pyrshah ïa kitei baroh kiba la dusmon ïa ki paidbah haduh ki Khyllung Khynnah bad kiwei kiwei da kaba kdew shai ba ki la pynkheiñ ïa ki kyndon jong ka Riti Synshar Paidbah ka Ri India (Constitution of India) lada phai ha kaba ïadei bad ka bynta jong ka Fundamental Rights naduh ka artikil ba 12 haduh 35 kumjuh ruh ban khlem da kheiñdor shuh haduh ki rai kiba la shim lyngba ka Supreme Court badon burom jong ka Ri India ha kaba ïadei bad u Aadhaar khamtam ha kaba ïadei bad ka rai kyrpang na bynta ki Jylla kylleng sawdong kiba don hapoh Northeast India.
Bun na ki briew kiba im ha la ka jong ka um syep katkum ki jingdonkam ba manla ka sngi ha la ka jong ka Jylla ki sah hapdeng ka umdum ynda haba sakhi shai halor ka jingshah beh kam ki nongtreikam sorkar ne wat ban duh kam bad lem da jingshah beh Skul ki khyllung khynnah naduh ki Skul sorkar bad skul private bad ban duh ïa kiwei kiwei ki bynta kiba shongdor kum ki jingïarap na bynta ka jingdonkam halor ka hok bad jingshisha ha la ka jong ka jingim tang namar ka jingbym don ïa u Aadhaar.
Haba tip shai ïa kine ki jingjia baroh napdeng ki paidbah ki khlem da ïaleh pyrshah ïa ki aiñ da kaba ki ïaid pynshongdor katkum ka hok bad jingshisha halor ka jinglaitluid kumba la pynkhamti bad kdew shai naduh kaba sdang lyngba ka Riti Synshar paidbah ka Ri India, ong ka kyrwoh ba la phah da u Bah Churchill Syiemlieh General Secretary, MACC (HEC) Central Body.
