Shillong, Jylliew, 27: U MLA jong ka Voice of the People Party (VPP) na North Shillong Constituency u Bah Adelbert Nongrum u la kam ba ka Roster System ka don ka jingïatakhuh bad ka Reservation Policy.
Ha u kyrwoh ba la phah sha ki lad pathai khubor ha ka sngi Baar u Bah Adelbert Nongrum u la ong, “namarba ka Roster ka la ïatakhuh bad ka Reservation Policy, dei ban pynjanai ïa ka Roster System lane dei ban pynthymmai noh ïa ka Resolution kaba la pynmih ha ka 12 tarik Kyllalyngkot, 1972,” bad ha kajuh ka por u la pynpaw ka jingpyrshah bad phah ruh ïa ka jingai jingmut ha kaba ïadei bad ka jingpynbeit thymmai jong ka Sorkar ïa ka Office Memorandum (OM) halor ka Reservation Roster kaba la pynmih ha ka 14 tarik Jylliew, 2023.
U la ong ba ha ka kyndon “A” jong ka Quantum of Reservation’ ka Office Memorandum ka kdew ïa ka jingmang ïa ki “Post” katba ha ka Resolution ba la pynmih ha ka 12 tarik Kyllalyngkot, 1972 la rai ba halor ka jingmang ïa ki ‘kam ba lait thylli”, namarkata ka Roster ka ïatakhuh bad ka Reservation Policy.
U Bah Adelbert u la dawa ba ïa ka Clause kaba kdew, “ym dei ban iehnoh thylli khlem da pyndep pura ïa ka Roster,” dei ban pynrung biang ha ki kyndon.
“Ha ka Guideline ‘B. ïa ki nongrim dei ban bud thik pa thik ha kaba pynkhreh ïa ka Reservation Roster’ katba ïa ka para B.4. ha ka Clause kaba ong, “ym dei ban iehnoh thylli khlem da pyndap pura ïa ka Roster,” la shu pyndam noh khlem daw,” u la ong.
Shuh shuh u la ong ba la dei ban ai jingïaroh ïa ki tnat treikam bapher bapher jong ka Sorkar kiba la pynkhreh shitom la shi snem kynthih ban lum jingkheiñ ha kaba ïadei bad ka jingpynrungkam na ki snem kiba ladep bad ïa ki jingtip kiba bniah halor ka Backlog jong ki kam ba thylli kiba la mang kyrpang.
“Hynrei kaei kaba jia mynta halor kane ka jinglum jingtip? Lada ka jingpyndam ïa ka Clause “ki jingtip kiba bniah jong ka Backlog Reserved Vacancies” dei ban don, namarkata, katkum ka kyndon jong para 2 jong ka Resolution kaba la pynmih ha ka 12 tarik, Kyllalyngkot, 1972 dei ban da kdew ha ka Remarks Column jong ka Reservation Roster la ka kam kaba thylli ka dei kaba la mang kyrpang kaba yn hap ban pyndap da uwei pat uba dei na kawei ka jaidbynriew namarba ym pat don u nongthep kam uba kotbor ha kata ka snem, bad kum kata ka jingpyndap ïa ka kam ba thylli dei ban leh la ka jong na ka bynta ka Reservation Roster Register,” ong u Bah Adelbert.
U Bah Adelbert u la ong ba ha ki District Level lane ha hi Sub-Divisional Level, ka Combined Reservation kaba 80 percent sha ki jaidbynriew Khasi-Jaiñtia ym dei shuh ban dang pyrkhing kum ha Jowai bad Shillong hynrei dei ban pyllait ha baroh kawei ka rilum Khasi, Jaiñtia bad Ribhoi District.
