Shillong, Nailur 15 : U National President ka National People’s Party (NPP) bad Myntri Rangbah ka Jylla Conrad K Sangma ha ka sngi Thohdieng, ula ong ba ka jingjied ïa ki kyrtong ban ïa aireng ha ka elekshon Lok Sabha 2024 kan shong eh kat kum ka jinglap bad jingshem bad sngewthuh ruh ba kin ïoh ïa ka jingjop.
“Ngi la sdang ban pynïaid ïa ki kam ki jam bad ka party ka la shong bishar ïa kiba bun ki kyrtong (jong ka Shillong Parliamentary seat)” ong u Conrad haba ïakren bad ki nongthoh khubor.
U ïathuh ba ka NPP kan ai ka kabu ba kumjuh ïa baroh ki briew, kiba kwah ban aplai bad ïakhun ïa kane ka elekshon na ka ticket jong ka party.
“Kan dei da ka lynti ban jied paidbah ha kaba ngin ailad ïa ki briew ba kin ïashim bynta ban pyntip ïa ka jingkwah jongki ban ïakhun bad hadien ngin sa jied pat ïa ki kyrtong kaba shong kat kum ka lad ba ki don ban jop bad kiwei kiwei” ula bynrap.
Une u Khliehduh ka NPP ula kyntait ban ong eiei haba kylli la ka NPP kan pynïeng ïa u MLA barim ka Mawsynram Bah Himalaya M Shangpliang, uba la phet dang shen na ka BJP, kum u kyrtong na ka Shillong Constituency.
“Hooid, ngi pdiang ïa baroh bad ngi la ju ong ïa baroh ba kino kino kiba wan ïasoh ka dei ban long ym da ka jingbuh kyndon. Ngam shym la kren ïa une u briew, hynrei nga kren kyllum lang ïa baroh . Kyllum lang, baroh kiba wan ïasoh da ka jingthmu ban shakri ïa ki paidbah bad ïa ka Jylla bad ka jingtreikam lyngba ka party. Namar kata, nga ong ba kino kino kiba don ka party ki lah ban aplai ïa ka ticket” ula ong.
Haba phai sha ka Tura Parliamentary seat, u Conrad ula ong ba ka don ka jingpyrkhat ïa ka sitting MP ne MP ba mynta ka Agatha K Sangma.
“Hooid, ngi don ia ka sitting MP nangtei bad kumta hap pyrkhat ïa ka MP ba mynta. Kumba nga ong, ngi don ïa ka Committee kaba khmih ïa ki kam ai ticket bad kumta, ki kam baroh kin sa long ruh kumjuh ha Tura” ula bynrap.
