Kyntait u Dr. Mukul ba ïakynduh ïa ki nongïalam bad thmu pynïasoh sha ka BJP

Shillong, Nailur 15 : U Nongïalam ka AITC bad Myntri Rangbah ba rim ka Jylla u Dr Mukul Sangma ha ka sngi Thohdieng, ula kyntait ba ula ïakynduh ïa ki Nongïalam jong ka Bharatiya Janata Party (BJP) ban ïakren ba u kwah ban pynïasoh noh sha ka Party.
U Dr Mukul ula kynthoh ïa kane halor ka jingkam ba dang shen jong u President ka BJP-Meghalaya Bah Ernest Mawrie ba u Dr Mukul ula sha kyntait ban wan pynïasoh sha ka BJP da ki Nongïalam ba halor ka party ha Delhi.
“Hato u (Ernest Mawrie) u ïakynduh ïa nga? Lane hato u Dr Mukul ula ïakynduh napdeng jong ki? Sngewbha kylli ïa ki. To kam pher ba ka politics jong ki kan ym ïaid khlem ka kyrteng jong nga. Sngewbha kylli ïa ki, wat kylli ïa nga” ong u Dr Mukul
Une u Myntri Rangbah barim ula ong ba ula ïohi ïa kum kane ka khubor ba la pynsaphriang khlem da kylli na u.
“Ngan sngewtynnad palat lada ki paralok na ki lad pathai khubor kin ailad lem ïa nga ban kynthoh shuwa ba kin pynmih ïa kum kine ki khubor” ula ong.
Ha kajuh ka por, une u Myntri Rangbah barim ula ong ba u dang pule bniah ïa ka rukom ïaid ka politics ha ka Jylla shuwa ba un shim rai ïa ki sienjam ban wan. Kat kum ka jingong jong u, kane ka long kaba donkam namar ka jingmih na ka elekshon MLA 2023 ha kaba ka AITC kala jop tang 5 seat na ka ïing ba 60 ngut ki Dkhot.
“Kumta, ka long kaba donkam ïa ngi baroh ban hap ïa bishar bha ïa ka rukom ïaid ka politics kaba la jia bad ka ban sa jia ha ki snem ban wan bad kumno ba ngin jied ha kum kine ki jinglong jingman” ula ong.
U Dr Mukul ula ong “Ki don ki daw ba ki briew kum na ngi ban sngewkhia bad khuslai namar ngi don ïa ka lad ha ryngkat bad bun kiwei pat ki nongïalam ka Jylla ban ïashimbyntalang ha ka ban tei ia ka Jylla”.