Shillong, Jymmang 26 : U MP ka Rajya Sabha na Meghalaya, Dr. WR Kharlukhi u la kob ba ka sorkar ba ïalam da ka National People’s Party kan dang bteng biang ban synshar wat hadien ka elekshon 2028.
Haba kren bad ki lad pathai khubor, Dr. Kharlukhi u la ong, “Kane ka sorkar kan bteng ban synshar tad haduh ban da kut kane ka samoi bad kan bteng biang ban thaw ïa ka sorkar ha u 2028 ban synshar biang ïa ka jylla.”
Haba kren pat halor ka jingphriang ki khubor ba ki lah ban don ki MLA na ka party NPP kiba thmu ban kynriah seng noh shwa ka elekshon MLA 2028, une u nongïalam ka NPP u la ong, “Ngin sa peit ïa kane ynda la poi ka elekshon. Lada kita ki MLA kim pan tiket shuh te ngan sa ngeit. Hynrei kan ym long pat kumta.”
Da kaba kyntait ba ka VPP ka la nang kiew ha ka jingïoh jingkyrshan na ki paidbah, une u nongïalam ka party u la ong, “Ngam ïohi ba kan long kumta. Dei ka party jongngi (NPP) kaba jop kham bun ha ka elekshon MDC ha JHADC. Hangne ruh ha ka elekshon MP ba la dep, ki la jop haduh 25 constituency na ki 29 tylli hynrei ha ka elekshon MDC pat ki la hiar sha ka 17 seat. Mynta, ngi don sa lai snem shwa ka elekshon kumta ngam ïohi ba kan buh jingma.”
Nangta u ong ruh ba ha rilum Jaintia, ha ki ar tylli ki elekshon ba la dep, ka NPP ka ïoh beit ban long ka party kaba jop bun eh khamtam haba khein ïa ka jingïoh bun vote tam. “Ngi la nang kiew ka jingïoh jingkyrshan bad ngin bteng ïa kane. Ha kane ka elekshon MDC ha JHADC ngi la jop 13 ngut katba ha ka samoi ba la dep ngi jop tang 12 ngut,” u la bynrap biang.
Shuh shuh u ong ba ha Khasi Hills pat mynta ka kynti ki ïoh tang saw ngut ki MDC. Hynrei u ong ba hangne ka jingïapher ka long ba ka jingheh ka constituency ka long jan mar katjuh bad ki constituency MLA. “Ha ka samoi ba la dep ngi ïoh saw ngut ki MLA bad kumta mynta ruh ngi ïoh saw ngut ki MDC. Kumta ka neh kumta. Tangba watla katta ngi khmih lynti ba ha ka elekshon ban wan ngin sa lah ba leh khambha shuh shuh.”
Ha kawei pat ka liang, u la ong ba u sngew ïahap ba ka VPP kan pyrshang ruh sha rilum Garo namar kum ka party kan bha ba kan rung lang ha baroh kawei ka jylla ym dei eh tang ha kawei ka jaka.
