Da ka Cultural Meet cum Academic Award pynlong ka KSU ban tehsong ïa ki Khasi ha Mizoram

Shillong, Jymmang 26: Ka KSU Vairengte Circle, Kolasib District, Mizoram ka la pynlong ïa ka Cultural Meet cum Academic Award ha ka 24 tarik u Jymmang 2025 ha Vairengte Community Hall, Kolasib District, Mizoram ha ka por 12:30 nohphai sngi hajan ka shnong Khasi Veng, kaba dei ka shnong ba la shong la sah da ki Khasi naduh hyndai hynthai ha shwa ban kha ïa ka jylla Mizoram lane Meghalaya bat wat ïa ka Assam.
Ka jingthmu jong ka KSU Vairengte Circle ban pynlong kum kane ka lympung ka long ban lum ban lang ïa baroh ki Khasi kiba la shong la sah naduh mynshwa ha ka jylla Mizoram bad ban ai mynsiem ïa ki khynnah pule Khasi ba kin shim khia ïa ka pule puthi kaba long ka atiar ban kyntiew bad ïada ïa ka Jaidbynriew Khasi ha jylla Mizoram.
Ha kane ka lympung la wan ïa shim bynta da baroh ki Khasi ba la shong la sah ha Mizoram kiba kynthup ïa ki Khasi ba sah ha ki shnong Khasi Veng, ha Phaisen bad ha Saipum. Baroh kine ki shnong ki dei kiba dang hab ha ki thaiñ nongkyndong bad ki long kiba sahdien ha ka liang ka ïoh ka kot.
Ki Khasi ba long trai shnong ha Mizoram ki don kumba 115 longïing ha kaba kumba 80 longïing ki don ha Khasi Veng (Veng ka mut shnong ha ka ktien Mizo). Ki don kumba 500 tam ngut ki Khasi bad jan baroh kim im ja da kaba rep tympew bad kwai.
Ka KSU ka la pynkha ïa ka KSU Vairengte Unit ha u snem 2009 hadien ka jingshah thombor ki nongrep Khasi ha kiwei pat ki Jaidbynriew heh paid bad lyngba ka KSU Vairengte Unit bad ka Khasi Welfare Committee Vairengte la lah ban pynbeit ïa ka jingïakynad lyngba ki jingïakren bad jingïasyllok bad ki heh paid Mizo.
Ha kane ka lympung ba la pynlong da ka KSU Vairengte Circle, la khot sngewbha ïa u B. Lalchhanzova uba dei u myntri u ba peit ia ki tnad Land Revenue & Settlement bad Food, Civil Supplies & Consumers Affairs kum u kongsan. La khot ruh ïa u samla Donald V. Thabah, General Secretary ka KSU bad ïa u H. Vanlalbiakzuava, SDO Vairengte Civil Sub-Division kum ki symbud kongsan.
La pynkup burom ïa 9 ngut ki samla pule Khasi kiba hapdeng ka jingshem jingeh ki la lah ban pyndep ïa ki jingpule ki jong ki. Kine ki samla pule ki kynthup ïa ka Jessica, khun u Philmon kaba ïoh 1st Division ha ka Science, Mizoram Board of School Education (MBSE), High School Secondary Leaving Certificate (HSSLC).
U Sakti Sympli, khun u M. You Dhar, ba ïoh 2nd division ha ka Science, HSSLC, MBSE. U Augustine Pala, khun u Pitos Manar, uba ïoh 1st Division ha ka Arts, HSSLC, MBSE. U Augustine u la ïoh distinction ruh ha ki sobjek Mizo bad Education. U Wanbor Pala, khun u Tarchhian, uba ïoh 2nd Division ha ka Arts, HSSLC, MBSE.
U Generous Pajat, khun ka Paulina Pajat uba ïoh 3rd division, HSSLC, Meghalaya Board of School Education. Ka Elsa Syih, khun u Elias Pajat, kaba ïoh 1st Division ha ka CBSE (high School), ka Elsa ka ïoh distinction ruh ha ka sobjek Hindi.
Ka Catherine Muksor, ka khun u Kemen kaba ïoh 3rd division ha ka High School Leaving Certificate (HSLC), MBSE. Ka Kristina khun u (L) Wanmon, kaba ïoh 3rd Division ha ka HSLC, MBSE. U Bilansius Ïaineh Pajat, khun ka (L) Senobia Sukmon Pajat, ba ïoh 3rd division, HSLC, MBSE.
Nalor katei ka lympung, ka KSU ka la ïoh ban ïa syllok kyrpang ruh ïa u Myntri ka sorkar Mizoram u B. Lalchhazova halor ka jingsahteng ban ai ïa ki Land Settlement Certificates ïa ki longïing Khasi kiba la sah naduh hyndai ha katei ka thaiñ. Kum ban shu pyntip, ki Khasi wat la ki la sah naduh hyndai ha Vairengte kum ha ki shnong Khasi Veng, Phaisen bad Saipum hynrei kim pat ïoh ïa ki kot patta lane kot jaka na ka sorkar Mizoram.
Ka KSU ka la khyllie biang ïa kane ka mat hakhmat utei u Myntri bad une u myntri u la kular ba shen ka tnad ba dei peit ka jong u kan sa shong bad bishar halor kitei ki jingangnud ki Khasi ba sah ha Mizoram, ong ka kyrwoh na u Andrew Dkhar & Paul Pajat President & GS KSU Vairengte Circle Kolasib District, Mizoram.