Ka NPP ka seng ki riew shimkabu, ka Jylla kan sa jied thymmai ha u 2023: Dr. Mukul Sangma

Riangdo, Nailar, 12: Ka Meghalaya Trinamool Congress ka la thaw bad pynskhem ïa ki dkhot nongkitkam ka Block Committee ha Mawshynrut, West Khasi Hills, ha kaba ki hajar ngut ki paidbah Khasi bad Garo na kane ka thaiñ ki la tuid sha ka jingïalang kaba la long ha Mawthengkut ha ka sngi thohdieng.
Ha kane ka jingïalang paidbah, u nongïalam ba hakhlieh jong ka party na ka Jylla u Dr Mukul Sangma u la donlang, ha ryngkat ka jingdonlang ruh da u nongïalam ka party na Mawshynrut u Justin G Momin ryngkat kiwei kiwei de ki nongïalam jong ka party.
Haba kren ha ka jingïalang, u Dr. Mukul Sangma u la ther bad buh jingkylli ruh hakhmat ki paidbah ïa ka jingïatrei lang hapdeng ka NPP bad BJP ha kane ka sorkar kaba mynta. “Ha u 2018 ki dkhot na ka liang ka BJP ki la jied ïa u Conrad Sangma ban long u Chief Minister bad u la long tang u ñiangkohnuguh jong ki. Baroh ki tip bad kynmaw ruh kumno ba u Home Minister Amit Shah u la wan hi dalade ban kynshoit ïa u Chief Minister Conrad Sangma ha ka jingïadei bad u pud u sam bad tang hapoh shi bnai u la ïa soi ïa ka soskular bad ka Assam”.
“Mynta pat ka NPP ka ong ba kan ym ïatreilang shuh bad ka BJP bad kan ïakhun marwei ha kane ka elekshon ban wan ha u 2023. Kine ki bor ba na shabar kiba ïa pait ki wan ban thaw ïa ka jingïatreilang kaba bym khuid. Ki kular shibun kiei kiei shwa ka elekshon, hynrei hato ki bat ïa ki jingkular jong ki ?. Kane ka pyni shai ba kane ka sorkar ka dei ka bym lah satia ban shaniah. Ka jylla hi bad ki paidbah nong shong shnong kin ai jingsneng bad ka jingkylla kan sa wan ha u snem ban wan”, u la ong.
U Dr Mukul haba ther jur halor kane ka sorkar kaba la ïalam da ka NPP namar ka jingbym lah bad jingtlot ka synshar khaddar, u la ong ruh, “Ngi donkam ban ïatreilang ha baroh ki liang na ka bynta ban ïada ïa ka hok jong ki paid nongshong shnong, ki riti dustur, ki jinglong ba kyrpang jong ngi bad ka lawei jong ki samla jong ngi. Kumba long mynta kane ka sorkar ba la khyrwait shabi hi da ka BJP na shapoh, kam lah satia ban ïada ïa ka jinglong kyrpang jong ngi. Nga kwah ban kylli ruh ba balei u MLA jong kane ka thaiñ um lah ban wanrah ïa ki jingkylla ha ka Consituency. Ka por ka dang biang ba ki paidbah ka Constituency hi kin sa ai ka jubab”.
Na ka liang u Justin G Momin u la ther tyngeh pyrshah ïa u NPP MLA bah Gigur Myrthong halor ka jingbym don kam pynroi hapoh ka Consituency baroh kawei. “Lada phi leit kylleng ka Consituency, phin sa ïohi hi ba ym don kam pynroi ei ei. Lada phai sha ka koit ka khiah, ka la nang hiar sha trai duh khamtam eh hapoh kane ka Constituency. Watla kane ka Consituency ka ïa jan bad ka Assam, hynrei ym don ki lad ki lynti ban kamai jakpoh lane wat ki kam ki jam ruh ki duna palat. Kane baroh ka dei namar ka sorkar kam lah bad kam shimkhïa halor kumno ban pynïadei ïa kane ka thaiñ bad kawei pat ka jylla ba marjan”, u la ong.
Kiwei pat kiba la ai jingkren ki long u bah James Lyngdoh, bah Fernandes Dkhar State Youth President Maeghalaya Paradesh Trinamool Congress, bah Macmillan Kharbani President ka Nongstoiñ TMC Block Committee.