Nongstoin,Nailar, 12: Ka FGEM Higher Secondary School Nongspung kaba long kawei na ki skul ha ki thain Nongkyndong kaba la nangkiew na kawei ka por sha kawei ka por bad ban ïabeh shaphrang kum ki skul kiba don ha sor Nongstoin ha ka sngi Palei ka la pynkup burom ïa ki khynnah jong ka skul kiba pas ha ka eksamin SSLC bad HSSLC mynta u snem khnang ba kin don ïa ka mynsiem ïakhun ha ka pule puthi bad ban nangkiew ha ki kyrdan ba kham shajrong.
Ha kane ka prokram kaba la long ha phyllaw jong ka skul la ïa donlang ruh u President ka KSU CEC u Samla Lambokstarwel Marngar kum u Kongsan, u Pastor B.Marngar, u Principal jong ka skul Bah Kyrshan Marngar uba la pynïaid ïa ka jingïalang, u Samla JF Nongsiang u President KSU WKH, Samla F.Syiemiong Secretary KSU WKH ki dkhot M/C, ki Nonghikai, ki kmie ki kpa jong ki khynnah skul. La ïoh ruh ka jingkren na ka liang ki khynnah skul, ki kmie ki kpa jong ki khynnah.
U Principal jong ka skul haba kren ha kane ka sngi u la ong ba ka jingpass mynta u snem ka long 100% HSSLC bad 85% ha SSLC ha ka ula pynpaw ruh ka jingsngewnguh ïa u Blei ba u la leh kambah na ka bynta ka skul, ïa ki Nonghikai kiba la aiti met bad mynsiem watla ha i jingïoh i barit eh u la ai mynsiem ïa ki khynnah ban nangtrei shitom ban nang pass bha bad wan shakhmat, khamtam ha kane ka juk jong ka jingïaleh. U la pynkynmaw ïa kiba bun ki kam ba trei da ki wei ki jaitbynriew kaba sngewtynnad ka long mynta ngi la trei hi da ki Khasi.Kaba long ka wei na ki lad jingïada ïa ka jingwan ki nongwei sha ka jylla ka jong ngi.
U President ka KSU CEC Samla Lambokstarwel Marngar, u la long kum u Kongsan ha kane ka sngi haba ai jingkren u la ong ka jingdon kane ka skul ka la long ka jingmyntoi ïa kane ka dong ka thain hynrei kaba sngewsih ka long ka akor ka burom ka hiar arsut ha kine ki sngi.
U la pynkynmaw ha ki por ka mynnor ki biew ki tip ïa ka sang ka ma ki kamai ïa ka hok pynban mynta ki jingsniew ki sdang ban jop ïa ki jingbha. Ka donkam ka shlem saiñdur naduh dangrit ha kaba ki Kmie ki Kpa ki Nonghikai don ka bynta kaba khraw ngi hap ban pyndon kam ïa u dieng sympat ym ban pynmong pynmynsaw hynrei ban pynbeit ba kin long ka lawei ïa ka imlang ka sahlang.
U la ong ba ki khrawpyrkhat bun sien ki mih na ki nongkyndong namar katta ki khynnah ki don kam ka jingminot, jingkut jingmut, jingïai-shah, ka jingpyrshang ban poi sha ka thong ba ki kmie ki kpa ki angnud na ka bynta jong ki khun.
Kum ki khynnah skul kim dei ban buh ïa ka mynsiem bym lah hynrei ban ïai pyrshang bad ki kmie ki kpa ki ai ym ka spah ka phew na ka bynta ki khun hynrei khamtam eh ka jingnang jingstad, ban peit phuh ïa ki khun ki don ka sap kaba kumno (Talent Identification) ym ban pynbor ïa lada ki khem don ka sap ka phong. U la ong ba na ka liang ka seng ha i bor iba rit kan ai jingïatreilang bad kane ka skul.
La pynshongkun ïa kane ka sngi da ki jingrwai bad ki jingshad na ki khynnah skul bad ka jingsam ïa ki jingai sngewbha bad ka jingpule na ka ktien u Blei.
