Da ka Scholarship sam ka tnat CSR ka Star Cement sha ki khynnah ba pass ïa ka Star Merit Test

Khliehriat Nailar 12: Ka tnat CSR jong ka company Star Cement Lumshnong, mynta ka sngi ka la pynlong ïa ka prokram ba kyrpang ha Star Public School Lumshnong, ha kaba la sam ïa ki jingai jingiarap lane ki scholarship sha kito ki khynnah kiba ha ka kyrdan kaba khatar (class XII), kiba la pass ïa ka examin Star Merit Test kaba la pynlong mun ha ka 21 tarik u jylliew 2022, kane ka scholarship ka long kum ka jingkyrshan lem ïa kito ki khynnah kiba dang bteng ïa ka jingpule, u Secretary jong ka tnat pule puthi jong ka Meghalaya, u bah R. Rapthap, u la long kum u kongsan ha kane ka sngi.
Ïa ka jingai scholarshaip, la phiah ha ki lai bynta, ki shiphew ngut ki khynnah kiba rung ha ka thup ba nyngkong, ki ioh T50000 tyngka marwei, ki ar phew ngut kiba rung ha ka thup kaba ar ki ioh ïa ka jingiarap kaba T30000 hajar tyngka marwei bad ki arphew ngut kiba rung ha ka thup kaba lai, ki ioh T15000 tyngka marwei, ki la don ruh khatphra ngut ki khynnah kiba stad kiba la jied na ki skul bapher bapher na Shillong, na Jowai bad na khliehriat,la sam ruh ïa ki momento bad ki syrnot sha kitei ki khynnah, la ong ruh ba kane ka jingsam ïa ki scholarship ka long kum ka jingpynshlur ïa ki khynnah ba kin nang ïai kiew shaphrang ha ki jingpule bad hakjuh ka por ruh ka long kum ka jingnoh syniang ban kyntiew ïa ka pule puthi hapoh ka district.
Haba kren kum u kongsan, u bah R.Rapthap, u la ai ka jingkhublei ïa ka tnat CSR jong ka company Star Cement kaba la lah ban pynlong ïa kane ka Star Merit Test bad kaba la ai ïa ki scholarshai sha ki khynnah kiba na ki skul bapher bapher kiba don ha East Jaiñtia Hills District, u kyrpad ruh ïa ka management jong ka company ba kan sngewbha ban noh syniang lem katto katne sha ka Policy ba thymmai ha ka pule puthi (New Education Policy),
U bah Rapthap, u la i ruh ka jingkhublei kitbok kitrwiang ïa ki ba la ïoh ïa kane ka Scholarship kiba la leh bha shisha ha ka exam jong ka klas XII ruh bad ong ruh ba kane ka kung pisa ba la ai ka dei ka pisa kaba bun shisha kaban long ka jingairap bad jingkyrshan ïa ki khynnah, ka long kaba shisha ba ka long kaba eh ïa kito ki longiïng kiba dang duna ha ka ïoh ka kot ban kyrshan ïa ki khun ha ki jingpule kiba kham shalor, bad ong ba ai ba kane kan long ka kabu kaba kyrshan ïa ki, ha kajuh ka por u la ai ki jingsneng jingkraw ïa ki khynnah ba kin nang ïai kiew ha ka jingpule jong ki namar ki khynnah skul ki dei kita ki rishot jong ka jylla.
U la ong ruh ba ka sorkar ruh ka don ki policy ban kyntiew ïa ka pule puthi, ki khynnah ki dei ruh ban treishitom, ha kajuh ka por u kyntu ïa ki nonghikai ba kin shim khia ha ka jingai jinghikai ïa ki khynnah.
U la ai ka jingiaroh ïa ka company Star Cement kaba la don ka jingkut jingmut ban pulut da ki phew lak ban kyrshan bad la khmih lynti ba ka company kan sa lah ban ai jingiarap shuh shuh ïa ki khynnah.
“Ka Meghalaya kam da dei eh kata ka jylla kaba bun ki marpoh khyndew (resources) sa mynta ïa u dewiong ruh la khang ka jingdawa ka dang bun, kumta kadei kaei kaei kaba sngewtynnad ïa kane ka jingleh ka Star Cement kaba la long kum ka lad ban kyntiew ïa ka jingnang jingstad ha ki jaka ba kyndong” ong u bah Rapthap.
U la ai ruh ka jingiaroh ïa ki kam kiba bha ba la leh da ka company Star Cement kaba ym dei tang ha kaba kyntiew ïa ka jingnang jingstad hynrei ka jingnoh syniang kaba bun ha kiwei kiwei ki bynta ruh ruh ban kyntiew ïa ka district bad ka company ka lah ruh ban theh jingiarap bun kaba kham palat ban ïa kaei ba la buh.
U la kyntu ïa ka company ba kan sngewbha ban leh eiei ruh ha kaba ïadei bad ka khuid ka suba ha ka district, ban lum ïa ki plastik na ki surok, ki lynti syngkien khnang ba ka jaka, ka thaiñ kan itynnad kaba dei ruh kum shibynta ban ri khuid ïa ka mariang.
U Symbud kongsan, u Deputy Commissioner East Jaiñtia Hills District, u Abhilash Banarwal, IAS, u la ai khublei ïa u bah R.Rapthap uba long u kongsan ha kane ka sngi, u ai khublei ïa ka company Star Cement bad ong ruh ba ka jingnang jingstad ka long kaba donkam bad ong ruh ba ki bor district ruh ki la ialeh katba lah ban kyntiew ïa ka jingnang jingstad, ïa ka koit ka khiah bad kiwei kiwei ki bynta, u la ïathuh ruh ba ki la don shiphew tylli ki skul hapoh ka district kiba la ioh ïa ka lad ban pynlong ïa ki smart classroom bad kane ka dei tang ka jingsdang, bad kin sa nang don shuh shuh ki skul ki ban ioh ïa kane ka smart classroom, u kyrpad ba lada don kano kano ka jingai jingmut ki dei ban pynsngew ha u Deputy Commissioner bad ha u bah R.rapthap khang ban dup lah shuh shuh ban kyntiew ïa ka jingnang jingstad.
U Unit Head, jong ka company Star Cement, u Lammaiah Manjula, u ai ka jingkitbok kitrwiang ïa ki khynnah kiba ïoh ïa kane ka scholarship, u la ai khublei ruh ïa ka tnat CSR kaba la leh shibun ki kam ha kiba bun ki jaka, la ong ruh ba ka company lyngba ka tnat CSR kan sa nag leh shuh shuh shibun ki kam ban noh syniang ha ka imlang ka sahlang.
Ki shiphew ngut ki khynnah kiba la ïoh ïa ka khung pisa kaba T50000 (sanphew hajar) tyngka ki kynthup u Dwip Sahajee, u Kishor Das, ka Pooja Kumari Jha, kiba na Star Public School Lumshnong, ka Prosperity Pyrngap, u Roshan Kumar Jha, u Robinhood Pasi, ka Fenishia Nongtdu, u Kynsaiborme Bareh, u Lambokstar Jyrwa, kiba na Khliehriat Higher Secondary School bad u Donaldson Chyrmang, na holy cross Higher secondary school Umkiang .
Ki la don ruh haduh ar phew wei ngut ki khynnah kiba rung ha ka thup kaba ar kiba la ïoh ïa ka scholarshi kaba T30000 tyngka bad ki la don haduh ar phew san ngut kiba rung ha ka thup kaba lai, kiba ïoh ïa ka scholarship kaba T15000 tyngka marwei, nalor kine ki la don ruh 18 ngut ki khynnah kiba stad (Bright Students) kiba la jied na ki skul bapher bapher kiba na Shillong, na Jowai bad na Khliehriat.
Kiba ïa don lang ha kane ka prokram ki kynthup ruh u Joint Director-School Education and Literacy Jowai, uba dei ruh u Incharge DSEO Khliehriat, u bah Luckystar Lyngdoh, u Administrative jong ka company Star Cement, u Tejbir Singh, u Management Representative, u Devander.K.Bansal, u Principal Star Public School, u Dilip Kumar, ki khynnah skul, ki nonghikai bad ki Principal kiba na kiwei kiwei ki skul.
Ïa ka prokram la pynïaid da u Manager CSR Star Cement, u Kingsok.K.Borah, la pynbyrngia da ki jingshad bad ki jingrwai na ki khynnah skul.