Ka NLU ka la pynwandur ïa ka jingnang jingtip ki samla pule halor ka aiñ: Arun Ram Meghwal

Shillong, Naitung 13: Ka National Law University Meghalaya ka la rakhe ïa ka sngi seng kaba shisnem hapoh ka APJ Abdul Kalam Auditorium, National Law University Meghalaya, Mayurbhanj Complex, Nongthymmai, Shillong. U Arjun Ram Meghwal, Union Minister for Law and Justice u la wan ban long kum u kongsan.
Haba kren ha kane ka sngi lyngba ka video conferencing, u Arjun Ram Meghwal u la pynpaw ka jingïaroh ïa ka National Law University Meghalaya ha kane ka sngi rakhe ïa ka jingdap 1 snem ha kaba u la banjur halor ka jinglong kongsan ban pynkylla ïa ki kam aiñ ha India. U la ban jur halor ka jinglong kongsan jong ki jaka pule kum ka NLU Meghalaya kaba pynwandur ïa ka jingnang jingtip halor ka aiñ bad ban ïoh ïa ka hok ha kylleng ka ri India.
Haba kren halor ka jingpynkupbor ne ka Empowering Legal Education and Access to Justice, bad ka jingdon bynta ka NLU Meghalaya, ka Myntri ka tnat Law ka Dr. Mazel Ampareen Lyngdoh ka la batai halor ka jinglong kongsan jong kane ka sngi kum ka juk jong ka jingwanrah jingkylla ïa ka jingtip halor ka aiñ ha ka jylla. Ka la banjur ba ka jingpule ïa ka kam aiñ ka dei ban ïaid shalyndet jong ka jingsngewtuh ïa ka aiñ, bad ka la banjur halor ki jingïohi jong ka na ka bynta ka NLU Meghalaya ban saiñdur ym tang ban ïoh ïa ki riewshem phang halor ka aiñ hynrei ban leh isynei ïa ki nongshong shnong bad ban pynmih ïa ki nongïalam kiba ïohi jngai.
Katba u Justice S. Vaidyanathan, Chancellor, NLU Meghalaya bad Chief Justice, High Court ka Meghalaya u la ban jur halor ka jingpule kaba long lawei, khamtam ha kane ka juk post-COVID ba la synshar da ki jingkiew ki lad teknologi. U la banjur halor ka jingdonkam jong ka digital literacy bad ka integration ka technology, ki jingstad kiba long artificial ne artificial intellengce (AI), bad ki jingtip ba shimet ha ka ban pynkhreh ïa ki samla pule na ka bynta ki jingïakhun kaba lawei jong ki. Na ka liang u Justice Vaidyanathan u la pynthikna ïa kiba wan sha ka prokram ba watla ka AI ka lah ban ïarap ïa ka kam aiñ, kan ym lah ban mih bujli ïa ka jingstad jong u briew ha ka ban ai ïa ki hok katkum ka aiñ.
Na ka liang u Chief Secretary ka jylla u Bah D. P Wahlang u la ai khublei ïa ka university kaba la poi haduh une u mawmer ha kaba ka NLU Meghalaya ka la long ka jaka pule kaba kongsan ha ka jylla.
Kiwei pat ki heh ki haiñ kiba la don ha kane ka jingdap shisnem ka NLU ki long u Prof P. S. Shukla, Vice Chancellor NEHU, ki Judge ka High Court ka Meghalaya, Justice H. S Thangkhiew, Justice W. Diengdoh, Justice B. Bhattacharjee bad kiwei kiwei.