Ka jingïathnum shaphang ka dheng kali kadei kaba man ka minit man ka kynta bad man ka sngi bad baroh shisnem khamtam lei lei tang shu lait na 3 Mer Upper Shillong ïa kiba wan na sha ki thain Sohra bad ki thain West Khasi Hills, South West bad Eastern West Khasi Hills kynthup lang ïa kiba wan na ki thain Pynursla.
Kane ka apot kaba ju ktah bad pynsniew mynsiem ïa baroh ki nongleit nongwan ka ktah ruh wat ïa kiba wan na ki thaiñ Ri Bhoi tang shu poi ha ki thaiñ Mawiong bad Mawlai. Nalorkata kaba kham ktah bad pynsyrtok eh kadei ïa kito kiba wan na ki thaiñ Smit bad Mawryngkneng namar ki kali kiba leit sha Shillong ki hap ban mad ïa ka dheng kali kaba jur bha ha ki thain Laitkor, Nongthymmai bad haduh ki thaiñ Laitumkhrah.
Kadei ka jingshisha ban weng ïa ka dheng kali ha ka nongbah Shillong kadei ka kam ka bym don lynti shuh da kumwei pat lada ka sorkar kam nud ban shim da ki lad ki lynti kiba kham tyngeh. Ki don bun ki lad ki lynti lada ka sorkar ka don shisha ïa ka jingthmu ban ïakhun da kaba tyngeh ïa katei ka dheng kali kaba la long ka jingkhñium bad ka jingbitar lut ïa ki nongleit nongwan kiba wan na kylleng ki bynta jong ka jylla ban poi sha ka nongbah.
Kumban shu ai nuksa hangne, ki don bun ki skul kiba don ha pdeng bah jong ka sorkar Shillong khamtam lei lei kum ha ki bynta jong ka Laitumkhrah. Kumta lada dei ba ka sorkar ka kwah shisha ban weng ïa ka dheng kali ka la dei ban pyndonkam noh da ki bos ban leit shaw ne leit buh skul namar la kumno kumno kawei kawei ka bos ka lah ban kit haduh 30 ne 40 ngut ki khynnah skul bad lada jia ba don 1000 ngut ki khynnah skul kamut donkam tang kumba 15 – 20 tylli ki bos heh. Hynrei lada jia ba wan da ki kali lajong kumba ju leh baroh shi katta na bynta 500 ngut ki khynnah skul kin don beit haduh kumba 450 – 500 tylli ki kali.
Kawei pat ka mat kadei ka jingdheng palat ka lynti ban leit sha khyndailad lane shaduh sha Motphran. Na bynta kitei ki bynta, la sngewdei ban ai jingmut ba ka sorkar kan pynshlur noh ïa ki paidbah ba kin pyndonkam noh da ki bicycle ter ter naduh ki bynta jong ka IGP, Ophis DC ter ter shaduh Khyndailad bad Motphran. Ka la dei ruh ban ailad pat katto katne ki kali ban leit buh tiar ne leit shaw ïa kito ki briew ba thied jingthied shibun lane ka lah ban buh da ka por ïa ki kali ban ïaid.
Lehse da kaba leh kumta ym tang ba ka jingitynnad ka sawdong sawkun kan wanphai biang hynrei kan pynlong biang sa shisien pat ïa ka nongbah Shillong kaba lait ym tang na ka jingjur ki jingsawa naka jingbun ki kali hynrei wat na ka tdem bad kiwei kiwei. Haba phai pat sha ki bynta jongka Iewduh, katei kadei ka mat kaba kham jwat khyndiat namar naduh ba mih ki jingjia ha Them-Iewmawlong, ki kali kim lah shuh ban ïaid lyngba katei ka jaka bad kane ka la dei shi bynta jong ka dheng kali ha katei ka jaka.
Ka por ka dawa ruh ba ka sorkar ka la dei ban pyrshang noh da ki lad ki lynti kumno ban wanrah noh da ki fly-over ha kito ki jaka ba kham jur ka dheng kali khamtam eh ha ki jaka ba kham long pdeng kum ha ki bynta jong ka Barik, Jingkieng Mawlai bad ruh wat ha ki bynta jong ka Umshyrpi. Kaba kham pynisih eh kadei ba ha ki por ba don ka dheng kali, wat ki ambulance ba ïaid ruh ki shem jingeh ban ïoh rung napdeng.Na ka liang ka sorkar kam dei shuh ban pynslem hynrei ka la dei ban buh kham bun ki jaka pynïeng kali kiba kham kylluid bad ruh ban kham pynheh ïa ka surok kumba ka sdang mynta ban pynheh noh ïa ka surok na Shillong sha Dawki khnang ba ka leit ka wan jong ki paidbah kan kylluid lang ym tang ha nongbah Shillong hynrei kan long beit ryntih ha baroh kawei ka jylla.
Kawei pat kaba lah ban pyllait na ka dheng kali ka long ban don noh kiwei ki kynja iew ba kham heh kum kiba don ha Khyndailad ha kiwei pat ki bynta jong ka New Shillong lane ka Shillong ba thymmai. Hapdeng kine, ka don pat ka jingkyrmen ba ynda la lah ban pynkynriah ïa ka Secretariat, nangta ïa ka Assembly sha New Shillong ka jingkhapngiah lane ka dheng kali kan sa duna hi dalade ha kylleng ki jaka.
