Ka NEOG ym tang ban pynbiang ki jaka ïalehkai hynrei ba ki nongïalehkai ki ïoh mih madan : CM

Shillong, Naiwieng 16 : U Myntri Rangbah ka Jylla u Conrad K Sangma u la ong ba ka jingpynlong ïa ka Noerth East Olympic Games ym tang ban wanrah ban pynbiang ïa ki jaka ïalehkai hynrei khamtam eh ba ki nongïalehkai kin ïoh ban mih madan. Ïa kane u Myntri Rangbah u la ong haba kren kum u Kongsan ha ka jingpynhap pyrda ïa ka lympung ïalehkai 2nd North East Olympic Games 2022 ha SAI Training Centre hynne ka janmiet sngi Balang.
“Nga ai khublei ïaphi baroh iwei pa iwei,” ong u Myntri Rangbah haba kren bad ki nongïalehkai kiba lum sawdong ïa u. “Ka North East Olympic Games ym tang ba ka wanrah ban pynbiang ia ki jaka ïalehkai hynrei khamtam eh ïa ki nongïalehkai ba ki ïoh ban mih madan kata kadei kaba kham kongsan eh. Nga sngewkmen ruh ban ïohi ïa ka jingtbit bad ka jinglah ba ki samla na ka thaiñ North East ki don.”
“Nga sngew sarong ba ngi la lah ban pynlong ïa kane ka Games ha kata ka rukom kaba la ïahap kyrdan bad kiwei kiwei ki jylla ha ka Ri. Kane baroh ka urlong namar baroh ki ïatrei lang kum ka kynhun. Kine ki lympung ki pyni ruh ba lada phi trei kum ka kynhun bad aiti lut kumta kam don satia kano kano ka bym lah ban leh,” u la ong.
Shuh shuh u ong ruh ba ki kam ïalehkai ki hikai ruh shaphang ka jingjop bad ruh shaphang ka jingshah rem kaba long shi bynta jong ka jingim. U ong ruh ba ki jingïalehkai ki hikai ruh kumno ban khie pat na ki jingshah rem bad wanphai biang pat da ka bor kaba kham khlaiñ.
Na ka liang u Myntri ka tnad ïalehkai u la ong ba ka Meghalaya mynta ka la don ha lynti ban pynlong ïa kiwei pat ki lympung ïalehkai kiba kham heh nangne shakhmat. U la ai ka jingïaroh ïa ki lai tylli ki jylla kiba wan shakhmat duh bad khamtam ïa ka Meghalaya kaba la lah ban ïalehkai bha khamtam ïa ka Athletics Team kaba la rah ïa ka nam lahduh ha katei ka thup.
U Dr. Vijay Kumar pat u la ai ka jingïaroh ïa baroh kito kiba donkti ban pynurlong ïa katei ka Games kaba seisoh da ka jingtrei shitom ha kine ki khyndiat bnai ba la dep.
“Ka jingïaroh ba ngi ïoh na ki nongïalehkai bad ruh na ki ophisar na ki jylla bapher bapher ka la ai mynsiem haduh katta katta,” u la ong da kaba ïathuh ruh ban pynkhreh bad pynbit pynbiang na ka bynta ki 3000 tam ki nongïalehkai kadei ka kam kaba eh bha.
U ong ruh ba ka jinglah jong ki ban pyndep ïa ki kam baroh bad pynbiang nadong shadong kadei eh tang na ka jingïatrei lang kum kawei ka kynhun hapoh ka jingïalam jong u Myntri Rangbah kum u nongïalam ba hakhmat tam.
Na ka liang u General Secretary ka Meghalaya State Olympic Association, Bah Finely Pariat u la ong ba kadei ka burom kaba khraw ba ka Meghalaya ka don ïa u Myntri Rangbah uba la lah ban wanrah bad pynurlong ïa kum kitei ki lympung heh ha ka jylla.