Shillong, Ïaïong 06: U Chairman jong ka Meghalaya Industrial Development Corporation (MIDC) James K Sangma u la ong ba ka corporation kam pat shym la thied ïa kino kino ki jaka ha kine ki 5 snem ba la leit.
U Sangma u la pyntip ïa kane sha u MLA ka VPP u ba la shah suspon na North Shillong u Bah Adelbert Nongrum ha ka jingïakynduh bad u James.
Haba kren sha ki lad pathai khubor u Bah Nongrum u la ong ba u la wad ka jingpynshai na u Chairman ka MIDC ha kaba ïadei bad ka jingkynnoh ka CORP ba ka corporation ka la thied ka jaka kaba 300 acre ha Ri Bhoi district.
“U chairman u la ïathuh ba ka corporation kam shym la thied kano kano ka jaka ha kine ki 5 snem ba la leit,” ïathuh u Bah Nongrum.
U Bah Nongrum u la ong ba u chairman u la pynshai ruh ba na ka liang ka sorkar ka khlem mang pisa eiei na ka bynta ka jingdonkam ban thied ïa ka jaka.
