Ka Meghalaya ka don hapdeng ka jingma na ka jingshah teh ha u drok : Mahila Congress

Shillong, Naitung, 01: Ka Meghalaya Pradesh Mahila Congress (MPMC) ka la pynpaw ïa ka jingsngewkhia halor ka jingma kaba ap ïa ka jylla na ka jingjyllei ki nongdih drok bad ka la kyntu ruh ban ïatreilang kumno ban ïakhun pyrshah ïa kane ka jingeh.

Ha u kyrwoh, ka President jong ka MPMC ka Kong Joplyn Scott Shylla ka la pynpaw ïa ka jingktah ba shyrkhei na ka jingdih drok ki samla, da kaba kdew ruh ïa ka jingjia ki bapher bapher na u drok, ka jingkhaii drok bad ka jingsep ei ki sap ki phong jong ki samla.

Ka MPMC ka la ithuh ïa ki katto katne ki daw kiba wanrah ïa ki jingeh, kynthup ïa ka jingbym donkam donjam, ka jingpynbor na ki paralok, ka jingsuk ban ïoh ïa u drok, ki longiing kiba la jot la pra bad ka jingktah ka bor jabieng.

Ka Kong Shylla ka la ong ba ha kine ki khyndiat snem, ki khubor ba ïadei bad ki jingjia kiba ïadei bad u drok ha Meghalaya ki la kiew bha. Naduh ka jingïoh kurup ïa u drok heroin bad brown sugar ha Shillong bad Jowai, haduh ka jinglap ïa ki network khaii droks kiba treikam ha ki khappud jong ka jylla bad ka pyrthei, ki dak ki shin ki paw shai: Ka Meghalaya ka don hapoh ka jingma na ka jingshah teh ha u drok. Ki khynnah shynrang bad kynthei kiba dang rit, don wat kiba dang rit ka rta, kiba shah khring ha ka jingdih buaid bad ki kam runar.

“Ki don bun ki daw ba balei ba ki samla jong ngi ki shah pynngop ha ka jingdih drok: Ka jingbym donkam bad ka jingbym don jingthmu, ka jingduna ki lad kamai, bun ki samla ki sngew ba ki la duh jingkyrmen bad ki la shah kyntait ha ka imlang ka sahlang.  Ka jingpynbor jong ki paralok bad ka jingkwah ban ïahap kyrdan.  Ka jingsuk ban ïoh ïa u drok namar ka jinglait rynghang ka khappud bad ka jingbym lah ban pyntreikam ïa ka aiñ ha ki katto katne ki jaka,” ka la bynrap.

Ban ïakhun pyrshah ïa kane ka jingeh, ka MPMC ka la ai jingmut kum ka jingpynjari da ka aiñ kaba kham khlaiñ ban khanglad ïa ki network khaii drok, ka jingpynbha bad jingai jingmut ïa ki nongdih drok, ki jingpynsngewthuh ban hikai ïa ki samla pule shaphang ki jingma jong u drok, ka jingpynkupbor ïa ki samla lyngba ka jingpynroi ïa ki sap, ki jingïalehkai, bad ka jingseng kam seng jam, ka jingkitkhlieh jong ka Sorkar bad ka jingïashim bynta lang da ka imlang ka sahlang.

Ka Kong Shylla ka la banjur ïa ka jingdonkam ban don ka jingtreilang, da kaba ong, “ki samla jong ngi kim dei tang ka lawei jong ngi—ki dei ka mynta jong ngi bad ngim lah ban shah ban pynduh noh ïa ka jong ki ha u drok.”

Ka la khot bad wer ban tei ïa ka jylla Meghalaya kaba lait na u drok, ha kaba ki samla kin dup lah ban kiew, ban roi, bad ban ïalam da ka jingsngew sarong.