‘Ai noh da ka shuki jong phi’, pan ka nongdie madan na u heh ophisar ka Shillong Municipal Board
Shillong, Naitung 01: Ki bor pynïaid jong ka Shillong Municipal Board ha ka sngi baar ki la bteng ban khmih biang ïa ki syrnot ne ki Certificate of Vending jong kiba shongdie madan ha Khyndailad naduh ka por mynstep bad marsien poi hajan ka lad ban leit sha Lum Survey ka la don ka jingïania kaba khluit bha hapdeng kiba die madan bad ki heh ka tnat Shillong Municipal Board.
Kane ka jingïania ka la mih na ka daw ba ki bor pynïaid ka SMB ki la phah lum ïa ki tiar ki tar bad ba la thmu ruh ban phah kit noh ïa ki. “Ngi la shong hangne la slem bad kumno yn lah ban sangeh die hangne bad lada shah lum ki tiar bad lada ym ïoh shuh ban shong hangne ai noh da ka shuki jong phi ba ngin shong,” ong kawei na kiba die madan.
Halor kane u heh ophisar ka SMB u la khot sngewbha ïa katei kaba die madan ba kan wan shongnoh ha ka shuki jong u. Ha kane ka jingïania na ka liang ki bor pynïaid ka Municipal, ki Magistrate bad ki bor pahara ki la hap ban ïaid noh shakhmat.
Katto katne ngut pat ki longkmie ki la kyrpad ïa u CEO ka SMB ba un khot pynlong da ka jingïalang khnang ban pynsngewthuh ïa ki nongshong dukan halor kane ka jingdonkam ban ïoh ki kot ki sla ban shong die ha madan.
Related Posts
Ki don pat katto katne kiba shong die madan ki la pynpaw ba ki la leit mih sha ka ophis na ka bynta ban ai ïa ki kyrteng bad ki kot kiba donkam hynrei haduh mynta kim pat ïoh satia. Nangta ki don pat kiba ïathuh ba kim don jingtip ban pyndap ïa ki kot ki sla na ka daw ka jingbym leit skul ne ban don ka jingnang jingtip halor kane ka bynta.
Kane ka jingbteng ban kyndang ïa kiba die madan, la ïohi ba kiba bun hi kiba shong die ki dei kiba la don ïa ki CoV bad ki don ruh pat kiba la don ki syrnot, ki la kynnoh ba dang step ki la shah kit ki tiar jong ki, ba kynthup ïa ki jaiñ bad kiwei ki tiar kiba remdor.
Ki bor pynïaid ka SMB ki la sdang naduh mynstep ban khmih ïa ki kot ki sla kiba die madan bad ha kane ka sngi ka duna bha ka jingïamai ïania kumba la long ha ka sngi Nyngkong.
Ha kawei pat ka liang ka surok Khyndailad, naduh ba la sdang ka jingkyndang ïa kiba die madan naduh ka sngi Nyngkong ka la kylluid bha bad baroh kiba die madan ki la kynriah kham shajngai na ka lynti ïaid ki paidbah bad la ïohi ruh ba ki paidbah ki la ïoh ban ïaid laitluid na kane ka lynti ïaid kjat kaba ki ju ïaid manla ka sngi.