Ka Meghalaya ka dei ka jylla ba bun tam ki skul haduh 15000 tylli katba hiar pat ka jingpule

Shillong, Risaw 9 : Ka Meghalaya ka dei ka jylla rit ba bun tam ki skul namar ka don haduh 15000 tylli ki skul bad ki don pat ruh da ki spah tylli ki skul ba ki khynnah skul ki don tang hapoh shiphew ngut bad don pat ruh ki skul kiba ym don khynnah skul wat tang iwei ruh.
Ka Jylla Meghalaya ka tam lut ïa baroh ki jylla ba rit ha kane ka thaiñ shatei lam mihngi ha ka jingbun ki skul.Haba ïanujor bad ki jylla kane ka thaiñ la lap ba ka Meghalaya ka don bun palat ki skul ban ïa kaba donkam ban don namar ha kiwei kiwei ki jylla kum ka Manipur, Mizoram, Nagaland bad Tripura ki skul ki don hapoh ka 5000 tylli.
Nalor ba don haduh 15000 tylli ki skul ka pule puthi pat ha ka jylla ka hiar bha bad ka jingpynrung skul ïa ki khynnah ha ki skul sorkar bad ha ki skul ba ïoh jingïarap na ka sorkar ka duna bha lada ïa nujor bad ki skul private.
Lada ïanujor, ka Manipur ka don tang 4,844 tylli ki skul, Mizoram 3,913 tylli ki skul, ka Nagaland ka don tang 2,752 tylli ki skul bad ka Tripura ka don 4945 tylli ki skul.
Ki skul kiba pynïaid da ki riewshimet ne kynhun ki don 343 tylli ha Tripura, 745 tylli ha Nagaland, 1025 tylli ha Mizoram bad 1003 tylli na Manipur.
Ha Meghalaya ki skul private ki don 2,637 tylli ki skul, 7,778 tylli ki skul sorkar bad 4,173 tylli ki skul ba ïarap pisa na ka sorakr.
Nalor kata ki skul bad ki Nonghikai ha Meghalaya ki ïapher na kiwei ki jylla ki Nonghikai skul ki don la ki kyrdan bapher bapher bad ki ïoh ruh ïa ka tulop bapher bapher wat la ka kam hikai ka long pat mar kumjuh.
Sa kawei ka jingeh pat mynta ha Meghalaya ka dei ka jingmih pat jong ki skul SSA lane ka Sarva Shiksha Abhiyan Scheme kaba la tip mynta kum ka Samagra Shiksha kiba dei ki skul sorkar pdeng . Ki don ki riew shimet ne ki kynhun kiba seng ïa ki skul ha ki jaka bapher bapher bad ïa ka tulop ki School Managing Committtee (SMC) ki phiah na ka tulop ba dei ban siew sha ki Nonghikai SSA.
Tang ki skul SSA ha Meghalaya ki don haduh 5,135 tylli bad kane ka jingbun kine ki skul mynta ka buh ïa ka sorkar ha ka jingeh nangno ban ïoh pisa ban siew tulop ne pynheh tulop ïa ki nonghikai SSA nalor ba ki dang ïakhih mynta ban dawa pynkiew tulop na ka sorkar jylla.
Ha kiwei kiwei ki jylla ym don skul SSA namar ïa ka skhim SSA kaba la tip mynta kum ka Samagra Shiksha la pyntreikam beit tang ha ki skul sorkar hynrei hangne ha Meghalaya pat kiba pyntreikam ïa ka skhim SSA ki dei ki riew shimet ne ki kynhun kiba seng ïa ki skul na katei ka skhim.
Ha Meghalaya ki don haduh 904 tylli ki skul kiba don ki khynnah skul ki don hapoh ka 10 ngut bad kine ki kynthup 353 tylli ki skul SSA, 133 tylli ki skul sorkar,214 tylli ki skul ba bei pisa ka sorkar bad 204 tylli ki dei ki skul private.
Nalor kata la lap ruh ba ha Meghalaya ki don haduh 164 tylli ki skul kiba ym don khynnah skul wat tang iwei ruh bad na kine 33 tylli ki dei ki skul sorkar, 18 tylli ki skul SSA, 13 tylli ki skul ba ïarap pisa ka sorkar. Ki don pat ruh ki skul kiba ka sorkar ka la theh pisa bun bha ban kiew ka pule puthi.