Ka Mawlai SC pyrshah ïa ka Maw-U-Tieng bad Lawei SC pyrshah ïa ka Laitkor SC

Ka semi-final Women Football League 2022
24-05-2022

Mawlai SC vs Maw-U-Tieng (12:30 PM)
Lawei SC vs Laitkor SC (3:30 PM)

Shillong, Jymmang 22: Ka lympung ïalehkai Women Football League ba pynïaid da ka Shillong Sports Association (SSA) ka la jam sha ka semi-final bad kane ka jingïakhun knieh rung final kan long ha ka 24 tarik Jymmang 2022.
Ki saw tylli ki team kiba la rung sha ka semi-final ki kynthup ïa ka Mawlai SC, Maw-U-Tieng, Lawei SC bad Laitkor SC. Ka Mawlai SC kan ïakhun pyrshah ïa ka Maw-U-Tieng ha ka semi-final ba nyngkong ha ka por 12:30 baje nohphai sngi bad ka Lawei SC pyrshah ïa ka Laitkor SC ha ka por 3:30 baje janmiet ha madan Third Ground, Polo, Shillong.
Ka Lawei SC ka la pynthikna ïalade sha ka semi-final hadien ba ka la khur jingjop pyrshah ïa ka Nongkohlew SC ha ka jingïakhun kaba la long ha ka sngi Saitjaiñ da kaba pynliem da 2-0. Ha katei ka jingïalehkai, ka Bankyntiew Ryntathiang ka la plie pyrda nyngkong da kaba thep shi kol tang ha ka jingïalehkai ba dang ïaid lai minit bad haduh kaba kut jong ka kylla step, ka Lawei SC ka la lamkhmat da 1-0.
Haba wanphai sha ka kylla miet, ka jingïakhun ka la nang ïakhaid baroh arliang ki thei ïalehkai ki la ïakhun tyngeh ban thep kol. Hynrei ka jingïalehkai ka la poi noh sha kaba kut hadien ba ka Pynïabiang Nongbet ka la thep ïa ka kol kaba ar na bynta ka Lawei SC kaba la jop bad rung syndon sha ka semi-final.
Ha kane ka sngi la sakhi ruh ka jingïalehkai kaba khatduh hapdeng ka Nongkrem SC pyrshah ïa ka Lumparing SC, ha kaba ka Lumparing SC ka la pynliem da 3-0. Ïa baroh kitei ki lai kol la thep da ka China Sangma ha ka minit ba 45 , 53 bad 55. Watla ka la khur jingjop hynrei ka Lumparing ka khlem poi sha ka thong da kaba pyndep ha ka kyrdan ba lai na ka miej kheiñ point na ka Group B da kaba khur 9 point.
Ka Mawlai SC ka bat kyrdan ba nyngkong ha ka Group A da 13 point katba ka Laitkor SC ka khur 13 point bad don ha ka kyrdan ba ar na ka jingïapher ha ka thep kol, ka Rahjingshai ka pynkut ha ka kyrdan ba lai da 7 point, ka PFR Academy ha ka kyrdan ba saw da 6 point, Onsides Sports ha ka kyrdan ba san da 4 point katba ka Thynroit ka khlem jop shisien ruh bad don ha ka kyrdan ba sha trai duh.
Ha ka Group B, ka Maw-U-Tieng ka bat kyrdan ba nyngkong da 10 point, kumjuh ruh ka Lawei SC ka khur 10 point hynrei ka bat kyrdan ba ar na ka jingïapher thep kol, ka Lumparing ha ka kyrdan ba lai da 9 point, ka Nongkohlew ha ka kyrdan ba saw da 5 point, ka Nongkrem ha ka kyrdan ba san da 5 point bad ka Nongthymmai kaba la rem ha baroh san sien ka don sha trai duh na ka miej kheiñ point.
Ka jingïalehkai final jong kane ka lympung kan long ha ka 27 tarik Jymmang ha ka por 4 baje janmiet.