Ka madan ha JN Complex kam shym la jot na ka Concert, la ïada da u Turf Protector: Paul Lyngdoh

Shillong, Nohprah, 14: U Myntri ka Sorkar Jylla uba khmih ïa ka tnat Jngohkai Pyrthei ha ka sngi Saitjaiñ u la ïathuh ba ka jingwan tem jong u nongrwai bapawnam ka pyrthei na ka ri Canada u Bryan Adams ha madan JN. Stadium kam shym la pynjot satia ïa ka madan phlang ha kane ka madan ïalehkai phutbol ba heh bad ba pawnam ha ka jylla Meghalaya.
Haba jubab ïa ka jingkynthoh jong ki paidbah ba ka jingpynlong ïa ka konsad ha JN Stadium ka la pynsniew ïa u phlang, u Bah Paul u la ong, “u Turf Protector u dei uba ka Sorkar ka la thied na ka bynta ban ïada ïa u phlang ha ka rukom kaba long Scientific khnang ba kan ym don kano kano ka jingpynjot. Ynda la dep ka konsad bad ynda la weng ïa u Turf Protector la lah ban pyndonkam biang.”
U la ïathuh ba mynta ka Sorkar ka la pynkjreh ban shna sa ïa ka Football Stadium ha ka shnong Mawkhanu kaba ngiam haduh 40 hajar ngut ki briew bad hapoh ka samoi treikam jong kane ka sorkar yn sa shna pyndep noh.
U Bah Paul u ïathuh ruh ba lyngba u Turf Protector la lah ban ïada ïa ka madan na ka jingjot da ka teknoloji.
“Ïa une ujuh u Turf Protector uba la thied da ka Sorkar Meghalaya ngi lah ban aiwai kylla. Ki la don bun ki briew kiba la wan ïakren bad ka Sorkar ba ngi donkam. Ym dei tang ha Meghalaya hynrei wat shabar ka jylla bad ha ka North East India baroh kawei haba ki don ïa kum kine ki jingpynlong ïa ki tamasa ka Meghalaya ka dei kawei na ki khyndiat tylli ki jylla kiba don ïa u Turf Protector bad ma ngi ruh ki kwah ban shim wai na ngi. Haba ki shim wai na ngi ki siew kylla ïa ngi bad kaei kaba ngi pynlut tang hapoh 2 ne 2 snem ngi la lah ba pynmih ïa ka bai thied (ïa u Turf Protector). Ka dei ka jingthied kam dei ka jingpynlut, ka dei ka Investment kam dei ka Wastage,” la ong shuh shuh u Bah Paul.