Shillong, Nohprah 14: Ka khubor ba la ïoh na ki pulit la ïathuh ba ha ka 11 tarik mynta u bnai ha ka por 9 baje mynmied, uwei u briew bym lah ban ithuh u la tied ïa u Bah Franrestar Khongsit da u tiar ba nep ha Police Bazar, Shillong. Ha kane ka jingjia, utei u lanot u la mynsaw jur bad la pynkitnoh sha Civil Hospital Shillong ban shah sumar.
Ha kawei pat ka jingjia ki la pulit ki la ïathuh ba ha ka step jong ka 11 tarik, ki nongshong shnong jong ka Lawjynriew Nongthymmai, Shillong ki la ïoh bat ïa arngut ki briew kiba kyrteng u Roshan Singh ba la 21 snem ka rta bad u Arminder Singh ba la 20 snem ka rta, katba ki dang pyrshang ban tuh ïa kawei ka thuk thuk bad ïa ki la aiti sha ki pulit.
Shuh shuh na ka liang ki pulit ki la ïathuh ba u Bah Manshailang Surong u la phah ka jingujor ba ha ka 10 tarik mynta u bnai ha ka por kumba 11.30 baje mynmied, ki runar bym lah ban ithuh ki la tuh ïa ka thuk thuk jong u kaba don u nombar ML-05Z-8190 na Polo, Shillong.
Ha kawei pat ka jingjia u Bah Proterwell Kharbani u la phah ka jingujor ba ha ka 10 tarik mynta u bnai ha ka por kumba 12.30 baje mynstep, ki runar bym lah ban ithuh ki la tuh ïa kawei ka masi napoh ka sem kaba don hapoh ka shnong Shyrwang (EWKH).
