Ka Lynti rel ha EJH ka shong ha ki paidbah ban rai la kan ai jingmyntoi ne em, ong u Nongïalam UDP

Shillong, Naiwieng 20 : U Nongïalam ka UDP bad Myntri Sorkar bah Kyrmen Shylla ha ka sngi Balang ula ong ba ka shong ha ki paidbah ka East Jaintia Hills District ban rai la ka jingwanrah lynti rel kan pynmyntoi ne em ïa ki.
Haba kren sha ki nongthoh khubor, u bah Kyrmen ula ong ba namar ka jingkhim ka por, ym shym la lah satia ban pynlong ïa ka jingïalang paidbah kaba thmu na ka bynta shim ïa ki jingai jingmut jong ki kynhun bapher bapher halor ka jingtyrwa wanrah lynti rel.
“ïa kane ka jingïalang ym shym la lah ban pynlong tang da ka jingkwah jong nga hynrei ka dei ban long ka jingkwah u paidbah. ïa kane ngi hap ban sdang da ka jingïasyllok bad ki kynhun bapher bapher bad mynta kam pat dei ka por namar bun kim pat ïalait. Ynda la biang ka por, ngin sa khot ïa ka jingïalang na ka bynta kane” ula ong.
Haba kylli, u Myntri ula ong ba ym don jingartatien satia ba ka roi ka par ka wan ha ryngkat ka jingmyntoi bad jingktah ruh.
“Hynrei ngi hap ban peit ïa kaei kaba kham ïohnong ne ïoh jingmyntoi la ka long da kaba wanrah ïa ka lane ban nym wanrah ïa ka. Lada ka dei kaba ïohnong bad ka aikam aijam ïa ki briew kane ka shong ha ki paidbah ban rai. Kam pher lada ka ïohnong katno katno ruh lada ki paidbah kim pdiang, ngim dei ban pynïaid shakhmat hynrei lada ki paidbah ki ong ba ngi dei ban wanrah bad lada ka ai jingmyntoi, ka don jingmut ban ïapynlut ïa ka por bad leh eiei” ula ong.