Ka long ka jingsngew sarong ïa ka jylla ba wan sakhi da u PM bad HM ïa ka jingbam smai : Prestone

Shillong, Lber 07: U Symbud Myntri Rangbah ka jylla u Bah Prestone Tynsong ula pynpaw ïa ka jingsngewkmen ba ha ka jingpynsmai ïa u Myntri Rangbah ka jylla ryngkat bad ki Myntri Sorkar la wan ban sakhi da u Myntri Rangbah duh ka ri u Narendra Modi bad u Myntri Kam Pohïing ka ri u Amit Shah bad u la ong kane ka dei ka jingsngew sarong ïa ka jylla ka ban neh ha ka histori pateng la pateng.
“Ka dei ka sngi jong ka jingsngew-sarong ïa ka jylla jong ngi, namar ka dei ka sien kaba nyngkong eh ba ha ka jingpyntian smai ïa u Myntri Rnagbah ka jylla ryngkat bad ka kynhun myntri la wan ban sakhi da u Myntri Rangbah duh ka ri, u Myntri Kam Pohïing ka ri. Kane ka long ka burom kaba khraw ïa ka jylla hi baroh kawei” ong u Bah Prestone hadien ba la dep ban bamsmai kum u Symbud Myntri Rangbah ka jylla.
U Bah Prestone ula ong ka jingdon ar ngut ki Symbud Myntri Rangbah ha ka sorkar ka long kaba donkam.
“Ngi la kheiñ bha ba la kumno kumno donkam ban don sa ïa uwei u Symbud Myntri Rangbah na ka ri lum Jaintia kumta ngi la ïa pynbeit ban kyntiew kyrdan noh ïa u Ma Sniawbhalang kum u Symbud Myntri Rangbah” ong u Bah Prestone.
Ula ong, hadien ba la dep ban pynsmai ïa u Myntri Rangbah bad ïa ka kynhun myntri, shen kin leit ban phai noh sha ka kam ban bteng biang ïa ka jingtreikam na ka bynta ban pynurlong ïa ki jingangnud jong ki paidbah ka jylla.