Ka kynhun pynlip ding jong ka Star Cement ka la pyllait im ïa u nongñiah bad nongbud jong kawei ka trok kaba la kem ding kynsan ha Lumshnong

Khliehriat Rymphang 27: Katba ki bor district bad ki bor pulit ki dang ïa bunkam ha ka election ban pynïaid beit pynïaid ryntih ïa ki kam jong ka election, ka kynhun pynlip ding (Fire Service Team) jong ka company dewbilat jong ka Star Cement Pvt Ltd, Lumshnong East Jaiñtia Hills District, mynta ka sngi ki la lah ban pyllait im ïa u nongñiah bad u nongbud jong kawei ka trok kaba la kem ding kynsan bad ki la lah ruh ban tem ïa ka ding kaba klang, ka jingkem ding jong kane ka trok kit jingkit ka la jia ha ka por 8 baje mynstep.
Ki thymmei khubor, ki iathuh ba hadien ba katei ka trok ka la iatyngkhuh bad kawei ka trok hywa (dumper) ka la leit ban tyllun sha kawei ka jaka riat ba long khlaw bad kem ding kynsan hangta, ka kynhun pynlip ding (Fire Service Team) jong ka Star Cement, tang shu ïoh jingtip ïa kane, mar mar, ki la mareh ban ai jingïarap bad ha kajuh ka por la lah ruh ban pynlip ïa ka ding ba klang ha kaba la lah ban tehlakam ïa ka jingpur ka ding bad ka ding ka khlem ioh ban pur sha kiwei pat ki jaka ba long khlaw.