Ka Kur Lyngdoh Umiong bad ka Kur Lyngdoh Nonglyngkien ki dei ka juh: SSKLM&LN

Mawkyrwat, Lber 15: Ka Seng Samla Kur Lyngdoh Umiong bad Lyngdoh Nonglyngkien (SSKLM&LN) ka pynpaw ka jingsngewdiaw kaba khraw bad ka jingpyrshah jur halor ka rai kaba la rai ha ka jingïalang hapdeng jong ka Kur Lyngdoh Umiong bad Kur Lyngdoh Nonglyngkien kaba la long ha ka 9 tarik u bnai Lber, 2024, ha ïing ka kong Bandaplin Lyngdoh Umiong, ban ïa pynbeit ïa ki kam jong ka kur ba la mih ar tylli ki kyrteng kur, kata ka long ka Kur Lyngdoh Umiong bad Kur Lyngdoh Nonglyngkien kumba la bthah na ka Khasi Hills Autonomous District Council (KHADC) shithi No. DCXXVII/Gen1/6/2023/9, dated: Shillong The: 28 tarik u Jylliew (July) 2023. Namur na ka liang jong ka KHADC ka sngewthuh ba ka Kur Lyngdoh Umiong bad Kur Lyngdoh Nonglyngkien ka dei kajuh bad ki dei shipara.
Namarkata, halor kane ka kam ka la don ka jingïapynbeit ar sien, hynrei kam shym la seisoh bad dei ha ka jingïapynbeit kaba khadduh kata ha ka 9 tarik u bnai Lber, 2024, ki kñi jong ngi ki la shim ïa ka rai ban ïa-tait kur noh shi syndon. Hooid, ka la don ka jingpynssngew na ki dkhot jong ka Kur khamtam na ki samla jong baroh ar kur ba kin shu ïateh kur noh, ba ka Kur Lyngdoh Umiong bad Kur Lyngdoh Nonglyngkien ka dei kajuh namar ha ka jingkular naduh ki tymmen jong ki mynshwa ki la sngew skhem ha la ka jong ka jong ka Nongrim, hynrei kim shym la sngap bad ka jingïalang ka la shu wai noh, kumta khlem da ïa saiñ ne shon kti bad ki la ïa pher noh ha la ka jong ka jong.
Shuh shuh la ong ba na ka liang jong ki katto katne ki bym kwah ban ïa-tait kur khamtam ki samla jong baroh ar kur ki la mih da ka jingsngewsih kthang na ka jingialang, namar ban ïa-tait kur noh ïa la u para, u hymem, u kñi bad ki ‘mei-san ‘mei-nah ki sngew ba ka long kaba sang kaba ma bed ka bym lah ban pdiang ruh ha ka inilang sahlang.
Namarkata, halor kane ka kam na ka liang Seng Samla Kur Lyngdoh Umiong bad Lyngdoh Nonglyngkien ki la ïa shong pyrkhat kyrkieh ha ka 12 tarik bnai Lber, 2024 ha Nonglyngkien bad ka la rai ba da lei lei ngi kum ki samla ngin nym lah ban pdiang ïa kane ka jingïatait kur kaba la rai da ki kñi jong ngi ha ka 9 tarik u bnai Lber, 2024.
Hynrei ngi nang tehsong nangne shakhmat ïa baroh ki ar kur kum ki shipara haduh ki sngi jong ka jingïap. Khnang ba kan nym wan jia ka nem sniew hapoh jong ka kur bad ban nym jia ka shongsang shongma hapoh jong kine ki ar ku hadien habud. Haba don kino kino ki kam hapoh jong kine ki ar kur ngin ïa long kawei bad ïa ki bat ki bynta jong ka kur ba la buh da u longshwa manshwa ruh kin long kumjuh.
Ka Seng Samla Kur Lyngdoh Umiong bad Lyngdoh Nonglyngkien ka la kyntu ruh ïa baroh ar ngut ki kñi kata ïa u bah Railing Lyngdoh Umiong bad u bah Dmikstar Lyngdoh Nonglyngkien ba kim dei ban leh shongshit kat ïa ka kam jong ka kur tang ban myntoi shimet haduh ban ïa-tait noh ïa ki para kur para jait, hynrei ki dei ban long ka nuksa kaba bha ban tehsong ïa ki para kur para jait khnang ba kan long ka jingkyrhu ïa ki longdien mandien jong ka kur.
Ka Seng Samla Kur ka la kyntu ruh ïa baroh ar ngut ki kñi ba kim dei ban pynsngap than ïa ki jingpyshoi ne pyntieng koh tympan jong ki briew ba nabar, ba lada kin ai ïa kata ka jait Lyngdoh Umiong ne Lyngdoh Nonglyngkien kin duh ïa ka jinglong trai ïa ka khyndew ka shyiap hapoh ka Ri Khaiñ. Hynrei ki dei ban buh ha khmat ïa ka kam jong ka kur, namar ïa ka khyndew ka shyiap dang lah ban thied sha kiwei kiwei ki jaka hynrei ïa ki para kur para jait kim nym lah ban thied. Uba nabar un nym lah ban tuklar ïa ka kam kur jong ngi bad u dei ban lehraiñ hi ban wan tuklar ïa ki kam kur kam jait jong kiwei. Kaba kongsan ki dei ban shim ïa ka jingkitkhlieh kum ki rangbah ban tehsong ïa baroh ar kur khnang ban wanrah noh ïa ka jingsuk hapoh ka kur bad hapoh ka Ri Khaiñ.
Ka Seng Samla Kur Lyngdoh Umiong bad Lyngdoh Nonglyngkien sa shisien ka ïai ban ba kat bym pat lah ban tehsong ïa ki hi ar tylli ki kur, ïan iai long ka dieng-pynkiang ïa baroh arngut ki kñi haba ma ki ki pyntreikam ïa ka kam jong ka kur bad ïa ka Ri Khaiñ lait noh ïa ki kam shimet jong ki. Namar kum ki samla ki tip shai ba ka Kur Lyngdoh Umiong bad Lyngdoh Nonglyngkien ki dei shipara bad ki dei ki juh.
Ka Seng Samla Lyngdoh Umiong bad Lyngdoh Nonglyngkien ka kyrpad ruh ïa ki bor ba dei khmieh ïa kine ki kam kur kam khaiñ la ka long ïa ka ophis jong u Syiem Maharam Syiem Ship, ka District Administration jong ka South West Khasi Hills District bad ka Khasi Hills Autonomous District Council (KHADC) ba kim dei ban pdiang ïa kino kino ki jingtreikam jong ka kur Lyngdoh Umiong ne Lyngdoh Nonglyngkien ne Shiphew Kur (kaba ngi la ujor ha u Executive Member (Elaka) ïa ka jingïateh soskular u kñi na ka kur Lyngdoh Umiong, hapoh ka Ri Khaiñ Nonglyngkien, katba ym pat lah ban ïa pynbeit ïa kine ki kam kur, khnang ba kan nym wanrah ïa ka jingkulmar hapoh jong ka kur bad ka Ri Khaiñ hi baroh.
Kane ka long katkum ka kyrwoh khubor ba la phah da u Pynkmenlin Lyngdoh, President, bad u bah Wanpyndap Lyngdoh, General Secretary jong ka Seng Samla Kur Lyngdoh Umiong bad Seng Samla Kur Lyngdoh Nonglyngkien.