Shillong, Naitung 27 : Ka Land Port Authority of India (LPAI), ha ka jingïatreilang bad ka Raj Bhavan, Shillong, ki la pynlong ïa ka Hindi Workshop ha Raj Bhavan, Shillong. Ïa kane ka workshop la thmu ban kyntiew ïa ka jingpyndonkam ïa ka ktien Hindi ha ki kam kiba manla ka sngi.
Kane ka workshop ka la sdang da ki kyntien pdiang sngewbha na u R.B. Sharma, ba la pynbud da ka workshop ba la pynlong da u Pawan Kumar Kharbanda. U Lat ka jylla Meghalaya, u Phagu Chauhan, GOC, 101 Area, Lieutenant General Sanjay Malik, Additional Director General jong ka North Eastern Region (NER) Directorate ka NCC, Maj Gen Gagan Deep, bad ki heh shipai, ki nongtrei ka LPAI bad ki samla pule ka North Eastern Hill University (NEHU) kiba la shim bynta.
Haba kren ha ka jingïalang u Lat ka jylla u la banjur halor ka jingdonkam ka ktien Hindi ha ki kam ka jingim, ka kolshor, bad riti dustur. U la kdew ba ka Hindi ka dei ka ktien kaba lai kaba la kren bha ha ka pyrthei.
U la ïaroh ïa ka jingpyrshang ki nongshong shnong ka Meghalaya kiba kyntiew ïa ka ktien Hindi, kaba la ïarap ban kyntiew ïa ka bynta ha ki jaka pule ka sorkar pdeng kiba don ha ka jylla. U la pynpaw ka jingkmen ïa ki jingïaibteng jong ka sorkar pdeng kaba hapoh ka Article 351 ka riti synshar ka ri ba kan kyntiew ïa ka Hindi.
Shuh shuh u Lat u la ai ruh ka jingïaroh ïa ka Indian Land Port Authority halor ki jingpyrshang jong ki ban kyntiew ïa ka ktien Hindi sha kane ka thaiñ shatei lammihngi bad pynpaw ka jingkyrmen bad kum kine ki prokram kin bteng ban pynlong.
Ka nongkren kaba kongsan ha kane ka workshop ka dei ka kong Filmeca Marbaniang, Assistant Professor ka Hindi ha NEHU, bad Professor H.K. Mishra, Head ka Hindi Department ha NEHU. Ki la sam ïa ki jinghikai halor ka jingdonkam bad ban pyntreikam ïa ka Hindi ha ki kam ki jam.
