Ka khana lyngkot shaphang u Shitang Rymbai ba la sot na ka thup ‘Ka Thymmei ka Elaka Rymbai

U SHITANG RYMBAI-KUM U NONGSYNSHAR:
Khliehriat, Nohprah 5: Khyndiat shaphang u nongthoh, u Dr Phervision Nongtdu u dei uwei na ki riew rangbah uba paw bha ha ri lum Jaintia bad ha ka jylla, u dei u Principal jong ka Jaiñtia Eastern College, Khliehriat, u dei uwei na ki nongthoh kot kaba long kum ka syniang ba radbah sha ka thoh ka tar jong u Khasi, kane ka khana shaphang u ma Shitang Rymbai ka dei kaba la sot na ka thup ‘Ka Thymmei ka Elaka Rymbai’ ba la thoh da u Dr Phervision Nongtdu.Ka Dorbar ba kyrpang ka la sdang hadien ka jingleh niam jong u riew niamJotkiri ban ïa mir jingmut halor ka jingiakynad bad ka jing kynrum kynram hapoh ka Elaka, kumjuh ruh ban ïakren halor ki katto katne ki mat, kiba mih na ka jingleh niam ba kyrpang jong u riew niam kumne:-Ban pynim pat ïa ka niam ka rukom, ban jied ïa ki briew kiba khuid bad ki bym don jingthoh bria ban long ki nongleh niam(Lyngdoh), ban jied ïa u nongsynshar (Doloi) ba tikna.
Ka khana pateng jong ki longshwa man shwa ka iathuh ba ki nong shong shnong na kylleng ki jaka ki la ïa wan ban ïa shim bynta shit rhem ha katei ka Dorbar kaba kyrpang hyndai ba la pynlong ha shnong Rangad heh.Ka la long ka Dorbar kaba shong kun bad kaba don burom, ka jing ia don lang ki riew niam Jotkiri bad u Shitang Rymbai, u kyrwoh jong u Syiem Sutnga, ki la pyn phuh pyn phieng shuh shuh ïa ka Dorbar. Ki jingiathuh khana pateng jong ki longshwa man shwa ki iathuh shuh shuh, ïa ki jing iatai nia ha katei ka Dorbar ba ka la long kaba shongshit bad kaba khluit, ki la don ki rangbah napdeng ki nongialam jong ka elaka kiba la kren pyrshah ïa u Doloi bad kwah ruh ban pynduh pyndam noh ïaka elaka Ynru Chnong. Ka Dorbar ka la neh haduh ar sngi lynter ban ioh iaka rai ba pura bad kiba dap doh.Shuh shuh, katei ka Dorbar ba kyrpang ka la shah ïa ki kynthei ban ïa don lang tangba ym shah pat ba kin ïa shim bynta ha ki jingiakren bad ki jingia tai nia.
Ka Dorbar ka la rai ban bud ryntih ïa ki mat kiba la mih na ka jingleh niam ba kyrpang jong u riew niam Jotkiri bad ka la jied ruh ïa u Shitang Rymbai ban long u nong synshar ba shi por jong ka Elaka.
U Shitang Rymbai u dei u briew uba sngur mynsiem bad uba don ka jingsngew ba kyrpang ïa ki kynthei ki khynnah bad ka jingangnud ban ïada kyrpang ïa ki na ka jinghshah thom bor jong ki riew shim kabu bad ki ‘riew bymman.U don ruh ka jingieid ba kyrpang ïa ki briew kiba duk bad kiba rangli, kitei ki jinglong jong u la bna ha kylleng ki shnong bad ki jaka, kumta ki nong shong shnong ki la khot ieid ïa u da ka kyrteng sin ‘Lahurnood’, ki nongialam bad ki nong shong shnong ki don ka jingkyrmen kaba khraw ha utei u nongialam ban pyn ioh biang ïa ka jingsynshar kaba khuid bad ka jingleh niam kaba long kyntang, ki la pynpaw ïa ka jingkmen kaba khraw haba u Shitang Rymbai u la pdiang ban long u nongsynshar bad u nongialam ka elaka.
U Shitang Rymbai nalor ba u long u briew uba jem nud, u long ruh u nong synshar uba shlur mynsiem bad uba shemphang ha ka rukom ka pyrkhat pyrdaiñ, ki khana tang ki iathuh shuh shuh ba ba ha shwa ba un shim ti ïa ka kam nongsynshar, u la don lypa ka jingangnud ban wanlam pat ïa ka jingsynshar kaba khuid ba suba bad ka jingshaniah hapdeng ki nong shong shnong. U la pynlong ki jingialang ba khah khah ha man la ki shnong bad ki kyntoit jong ka elaka ban ïa mir jingmut bad ki nongialam shnong na ka bynta ban thaw ki lad ki lynti ban pynduh pyndam ïa ki jing ïa kynad bad ki jingkynrum kynram, u la iohi ruh ïa ka jingbym don ki pud ki sam kiba tikna ka la long ba ïa ki nong synshar ban ai ka jingsynshar kaba beit bad kaba ryntih, kumta u la pyn skhem ïa ki pud ki sam jong ka elaka bad sieh ïa u maw pud uba la tip kum u ‘Moo-Kya-Shitang’, ha ka jaka kaba don shatei lam mih ning ha shwa ban poi ka shnong Soo-Kilo ban pyn ïa khlad ïa ka Elaka Sutnga, utei u maw pud u la duh noh hynrei ïaka jaka ba u ju don u maw pud la khot ‘Kya Shitang’ kumjuh ruh u la sieh ïa uwei pat u maw pud ha ka jaka ba don shaphang shthie lam mih ngi na ka shnong Moosianglamare kaba don hajan ka karkhana pynmih dewbilat ka Adhinik Cement Ltd kaba la pyn ïa khlad ïa ka elaka Narpuh, ïa une la khot ‘Moo-Tang’, kitei ki maw pud ki dei ki matti jong u bad ki long dien ki la khot bad jer ïa ki ha ka kyrteng bad ka nam jong u.
Ha ka por synshar u Shitang Rymbai, ki pud ki sam jong ka elaka Ynru Chnong kaba ju tip mynta da ka elaka Rymbai ki long kumne:- Sepngi: Ki Saw Lyngdoh (Elaka Jowai), Shathie haduh Moolakur (Mulagool), Bangladesh, Mihngi: Ka wah Liardieñsoo kaba pyn iakhlad ïaka elaka Sutnga bad shathie lam mihngi haduh u Moo Tang kaba pyn iakhlad ïa ka Elaka Narpuh.
Kumba la dep kdew sha khmat, ka jingiakynad hapoh kane ka Elaka Ynru Chnong, ki la wanrah ki jingkynrum kynram ha ki kam synshar khadar nalor ba ki la long ruh ki daw ba la nang pyn pjah shuh shuh ïa ka jingiadei hapdeng ki shnong, ki la long ruh ki daw kiba la pynorpait ym tang ïa ka jinglong jingman jong ka niam ka rukom hynrei ki la pyn artatien ruh ïa ka jinglong khuid bad ka jinglong kyntang jong u Doloi ban long u nongsynshar ha ka juh ka por u nong pyndep niam.
U Shitang Rymbai, kumba la kdew sha khmat, u long u nong synshar uba shlur mynsiem bad uba don lypa ki mat treikam na ka bynta ban wanlam pat ïa ka jinglong kyntang ka niam ka rukom kumjuh ïa ka synshar ka khaddar kaba khuid ba suba, u don ka jingngeit kaba skhem, ki jingleh niam ha ka elaka la ki long kiba rit ne kiba khraw, ki long kiba kyntang, um ju kwah ban khleh khaw lang ïa ki bad ki kam saiñ hima sima kaba dei solonsar..
(Yn dang bteng)