Nongstoiñ, Lber 4: Ka rep ka riang ka dei ka kam kaba muja tam ha ka jingim, ka dei ruh ka kam kaba uwei pa uwei u nongrep u long kynrad halor lade. Wat la u hap ban trei shitom bad ban shah ïa ka jingshit kyrang jong ka sngi, ïa u slap bad ka lyer, hynrei ki nongrep kim ju sngew pher namar ka dei ka kam kaba lah ban kyntiew ïa ka ïoh ka kot ka kami kajih bad ki im pahuh pahai khlem jingpyrwa.
Haba phai ha West Khasi Hills ki paitbah nongrep na ka thaiñ Umyiap ki dei kiba smat bad kiba trei shitom haduh katta katta bad ki don ruh ïa ka pyntha rep kaba biang bad kaba sei soh bha. Ha ka jingleit jurip jong u nongthoh khubor ïa ka rep ka riang ha katei ka pyntha, la lap ba ki nongrep ki dang thiew ïa ki ñiut na ki jaka rep jong ki bad wat hapdeng jong ka jingshit kyrang jong ka sngi ki trei shitom bad minot thop la ka kam.
La lap ruh ba ki nongrep ha katei ka pyntha ki thung bun jait ki jhur ki jhep kum ki kajor, bit, motor, phan, dhunia, sohlakum salad bad kiwei kiwei ki jait jhur. Ha katei ka jingleit jurip la ïoh ban ïakren bad kong A.Marngar kawei ka longkmie kaba dang thiew ñiut ha ka lyngkha rep jong ka bad haba kylli, katei ka longkmie ka la ong ba ka por ban sdang ban puh ban lur ïa ki lyngkha ka dei naduh u bnai Kyllalyngkot bad ka por ban thung pat ki ju sdang ha u bnai Rymphang.
Ki jait ki jhur ba ka ju thung kiba dei ki jhur tlang kum u motor, salad, dhunia, bit, kajor bad phan. Ka la ong ruh ba ki don lai jait ki phan ba ka ju thung, u phan saw, phan jatira bad phan ïong. Nalor kata ha ki snem ba la dep ïa ki symbai jhur ka la ju ïoh na ka ophis Agriculture, hynrei ha une u snem kam shym la ïoh satia kumta ka ha ban shu thied.
Ka la ong ruh ba u symbai jhur ba rem dor eh u dei u symbai kajor bad ka la thied ha ka dor khyndai spah sanphew tyngka shi kilo katba kiwei kiwei ki symbai kum ki motor, ki dhunia, salad bad kiwei kiwei dang lah ban ïoh ha ka dor shispah khyndaiphew haduh arspah tyngka shi kilo.
Haba kylli pat haduh katno ka lah ban pynmih tang na kaba die jhur, katei ka longkmie ka la ong ba ha ka shi aïom rep jhur ka lah ban pynmih ym duna ïa ka shilak sanphew hajar haduh ar lak tyngka tang na kaba die jhur.
Ka ju pynïaid ïew ruh ïa ki jhur kum ha Nongstoiñ bad don pat ki por ba ka leit die haduh sor Shillong. Ka la ong ruh ba la dei ka por ba ka ïew ka hat ka ïaid bha lei lei katno ka jingsngew muja wat la ka trrei shitom katta katno ruh.
