Nongstoiñ, Jymmang 6: “Katba nang mih ki sngi ki maw nam bad ki jaka ba pawnam ha kane ka bri u Hynñiewtrep ki la nang jah, namar ka jingbym ñiew kor jong ki paidbah nongshong shnong”, ong u bah Dmikstar Lyngdoh Secretary ka Ri Khaiñ Lyngdoh Nonglynkien haba ïakren bad u nongthoh khubor mynta ka sngi.
U la ong ruh ba lada ki maw niam bad ki jaka ba pawnam kiba don ha kane ka ri Khasi kim don shuh, khlem artatien wat ka jaidbynriew ruh kan jah rngai na kane ka sla pyrthei. U la ong ruh ba lada ki maw niam, ki maw nam ki don ha kino kino ki jaka la ki dei ki khyndew kur, ki khyndew hima, ki khyndew jong ki riew shimet, ka por ka la dei ba kin peit kin khmih bad ban pynneh pynsah, khnang ba ki pateng kiba hadien habud kin tip. U la ong ruh ba wat lada don ki mawniam ne ki mawbynna kiba la kyllon la dei ban pynïeng pat ïa ki.
U la pynkynmaw ba ha ka por hyndai, ïa kitei ki maw niam bad ki mawbynna la ring na ki jaka kiba jngai bad pynïeng ha kino kno ki jaka kiba don jingmut na ka bynta ban pynsah nam ïa ki ba la khlad, khamtam eh lada ki dei ki kñi rangbah jong kano kano ka kur ka jait bad kiba dei ruh ki nongshat nongkheiñ ki nongkñia nong khriam kiba leh ïa ki niam ki rukom.
U la ong ruh ba kaba phylla ka long ba ki tymmen hyndai ki lah ban ring ïa kitei ki mawbynna kiba jrong bad kiba heh tang da ki thning pathaw, ki jyrmi bad wat ban shu pynkie ha ka um ruh, namar ba ka jingngeit jong ki ha ka niam ka rukom ka khlaiñ haduh katta katta. U la ong ruh ba lada ka dei ha kine ki sngi, ïa ki maw bynna bad ki maw niam wat ki JCB ruh ki la shem jingeh ban rah.
Haba phai pat ha ka long briew man briew, u la ong ba ka long kaei kaei kaba sngewsih ban ïohi ba ha kine ki sngi ka jinghiar dor jong ka jaidbynriew Khasi, ka la long shaba palat la ka long ha ka riam ka beit ka akor ka burom bad ka kheiñ kur kheiñ jait. U la ong ba ka daw kaba kongsan eh ka dei na ka jingbud tynneng palat ïa ki nongwei, naduh ka put ka tem, ka ktien ka thylliej, ka thoh ka ka tar ka la hiar haduh katta katta.
