Ka jingthew ba shisha jong ka jingkiew jong ka ri ka paw haduh katno ki nongshong shnong ki ïoh ki lad jingsumar (Jagat Prakash Nadda)

Ka jingthew ba shisha jong ka jingkiew jong ka ri ka ju paw haduh katno ki nongshong shnong jong ka ki lah ban ïoh ïa ki jingdonkam ba kongsan kum ki lad jingsumar. Da ki phew snem, ka jingkiew dor jong ki dawai ka dang long ka jingeh kaba khraw ha kaba ïadei bad ka pisa tyngka na ka bynta ka koit ka khiah bad ka bha ka miat jong ki million ngut ha India. Ha kaba ïadei bad kane, ka Pradhan Mantri Bhartiya Janaushadhi Pariyojana (PMBJP), ka sienjam hapoh ka jingïalam jong u Myntri Rangbahduh ka ri u Narendra Modi ban pynbiang ïa ki dawai kiba bha ha ka dor kaba jem ban ïa ki brand ka la wanrah ïa ka jingkylla kaba jylliew bad kaba ryntih da kaba weng ïa ka jingduna kaba kongsan ha kaba iadei bad ka koit ka khiah jong ki paidbah.
Ha ka pyrthei baroh kawei, ki dawai kiba duna dor ki long u mawjam jong ki rukom ai jingsumar kiba lah ban ioh. Ki don haduh 80-90% na ki jingthied dawai ha kylleng ka pyrthei bad ki la don ka bynta kaba kongsan ha kaba pyniar ïa ka jinglah ban ïoh ïa ki dawai kiba donkam. Watla ki dawai kiba duna dor ki lah ban ïapher ha ka jingsong, jingbuh dak, bad ki bynta kiba pyndonkam ban shna ïa ki, ki jingwad bniah ki pyni ba kine ki jingpher kim ktah ïa ka jingtreikam jong ki ha ka jingsumar. Ki long kiba ïaryngkat bad ki dawai ba pawnam ha ka liang ka jingthew, ka jingshngaiñ, ka jingkhlaiñ, ka jingbha, bad ka jingthmu ban pyndonkam, da kaba bud ïa ki juh ki kyndon ba pyrkhing jong ka jingpynmih bad ka jingbha.
Ka PMBJP kam dei tang ka kam na ka bynta ka kam die khutia; ka pyni ïa ka jingpynkhlaiñ ïa ka rukom ai jingsumar jong ka India. Kane ka paw ha ka phang pdeng jong ka Janaushadhi Saptah mynta u snem, kaba pynkhih jur ïa ki million ngut ki nongïoh jingmyntoi. Lyngba ka rynsan kaba nang kiew stet jong palat 18,000 tylli ki Janaushadhi Kendra, ka skhim ka pynthikna ba ïa ki dawai lah ban ïoh ha ka dor kaba 50% haduh 80% kaba kham duna ban ïa ki dor ïew, kaba ai jingkyrshan ïa ki longïing ha ka imlang sahlang. Ki jingpeit bniah ha ki jaka treikam ki pyni ba ki nongïoh jingmyntoi ki sngewnguh ïa ka jingpynlait na ka jinglut bad ka jingkyntiew ïa ka jinglah ban ïoh ïa ki dawai.
Ka jingheh jong ka skhim ka paw shuh shuh ha ka jingpynmih mar jong ka. Ka Janaushadhika ai ïa ka thup jong 2,110 jait ki dawai bad 315 tylli ki tiar surgery kiba kynthup ïa 29 tylli ki bynta bapher bapher jong ka jingsumar. Hapoh ka jingpeit jong ka Pharmaceuticals & Medical Devices Bureau of India (PMBI), ka jingpynheh ïa ka kam ka long ka rukom treikam kaba ïaid beit, kaba pynshong nongrim ha ki jingtip kaba kynthup ïa ka jingpeit bniah ïa ka ïew ka hat, ka jingïatreilang bad kito kiba don bynta ha ka kam, bad ka jingpeit bniah kaba pyrkhing jong ka komiti jong ki riew shemphang, kaba pynthikna ba ka skhim kan ïaid beit ïaid ryntih bad ki jingdonkam jong ka koit ka khiah bad ki jingdonkam dawai jong ka ri.
Namar ka jingpeit bniah kaba khlaiñ, ki kompeni shna dawai jong ka India ki la kylla long ki nongpynbiang dawai kiba lah ban shaniah ha palat 200 tylli ki ri, kynthup ïa ki ïew kiba la pynbeit kum ka U.S., U.K. bad ka European Union. Ki kompeni shna dawai jong ka India ki nang ïar sha ki ïew kiba dang kiew kum ha Latin America, Africa, bad Eastern Europe.
Ka karkhana ka pynleit jingmut ruh ha ki biosimar bad ki dawai ba kham jemdor kiba ïadei bad ki dawai biologic, kumjuh ruh ban bei tyngka kham bun ha ka R&D ban pynmih ïa ki dawai kiba bha bad kiba kyrpang. Kine ki sienjam kiba peit shakhmat ki buh ïa ka India ym tang kum ka jaka pdeng jong ka kam shna dawai ha ka pyrthei hynrei kum ka nongïalam ha ka jingpynmih jingmut thymmai ha ka lawei ha kaba ïadei bad ki dawai kiba jemdor.
Ka jingïakren shaphang ka jingbha bad ka dor ka ktah ïa ka jingsngew jong ki paidbah. Ka PMBJP ka la pynduh pyndam noh da kaba suk ïa ka jingngeit ba ka jingjem dor mut ba hap ban kham pyntlot ïa ka jingbha haba shna lyngba ka rukom pynthikna ïa ka jingbha kaba bun bynta. Ia ki dawai la thied na ki nongshna ba la pynskhem da ka WHO-GMP, ban pynthikna ïa ka jingbud ryntih ia ki kyndon pynmih dawai ha ka pyrthei. Ka protocol ka ong ba man la kawei pa kawei ka thup dawai kadei ban ïaid lyngba ka jingpynshisha kaba pyrkhing ha ki jaka shna dawai ba la mynjur da ka National Accreditation Board for Testing and Calibration Laboratories (NABL)shwa ba kan poi ha ka jaka buh dawai. Kine ki dawai ki ïahap bad ka Drugs and Cosmetics Act, 1940, bad ki ïadei bad ki jinglong jingman jong ka jingshngaiñ bad jingtreikam jong ki dawai ba la shna da ki kompani ba heh. Ka jingïaid lynti ban pynthikna ïa ka jingbha ka kynthup ïa ki jingpeit bniah shwa ban thied bad ka jingtest hadien ba la thied. Ka PMBI, ka tnad kaba pyntreikam ïa ka Pariyojana ka ju buddien bad peit bniah man ka por ïa ka jinglong jong ki dawai ban pynthikna ba kan ym don kano kano ka jingïaid lait na ki kyndon.
Ka rukom sam kaba pyndonkam da ka IT kaba la kyrshan da ki san tylli ki jaka buh mar kiba thymmai bad 41 ngut ki nongpynbiang marba kyrpang ha kylleng ka ri ka la pynthikna ba ka rukom pynpoi mar kan dang ïaineh wat hapdeng ki jingpynthut.
Ka jingphai khmat ba kongsan hapoh ka jingthmu “Viksit Bharat @2047” ka long ban tei ïa ka rukom ai jingsumar kaba khlaiñ, kaba ryntih, bad kaba lah jemdor na ka bynta baroh. Kane ka kynthup ia ki hospital kiba kham bha, ka jinglut jingsep kaba kham duna, ka jingsuk ban ioh ia ka jingsumar, bad ka jingdon ki dawai kiba jemdor. Da ki jingïatreilang jong ki bynta bapher bapher, ka PMBJP ka pyni ba da ka jingthmu kaba dei jong ka tnat treikam, ka lad ai jingsumar ka lah ban long kaba bha bad kaba lah ban ioh da baroh. Ka Sorkar hapoh ka jingïalam jong u Myntri Rangbahduh ka ri u Narendra Modi ka shimkhia ban pynthikna ba kane ka Pariyojana kan bteng ïa ka jingïaid shaphrang jong ka jingkiew bad kan pynneh ïa ka kyrdan jong ka kum ka nuksa ha ka pyrthei na ka bynta ka kam ai jingsumar kaba jemdor.
(U Nongthoh u dei u Myntri Sorkar Pdeng ba dei peit ïa ka Tnad ka Koit ka khiah bad Chemicals & Fertilisers).