Ka jingstad jong ka longkmie ban sharai ïa ki khun ka dei ka jingduwai: Fr. Remiki Niangti
Mawkyrwat, K’lyngkot 23: Ka Dorbar pyllun ba 17 jong ka Synjuk ki Kynthei Katholik Nongstoiñ Diocese ka la pynlong ïa ka jingïaseng kyrpang da kaba buh ruh ïa ka phang pdeng kaba ong, “Suk ma phi kaba la ngeit ba ka Ktien U Trai kan sa urlong da shisha”, kaba la pynshong nongrim ruh na ka jutang bathymmai lyngba ka Gospel u Lukas Lynnong kaba 1 dkhot ba 48.
Ïa ka jingïaseng ïa kaba la pynkut noh ha ka sngi U Trai la sdang naduh ka Sngi Thohdieng jong ka taïew bad la pynlong ha Mary’s Help of Christians Parish Mawthong kawei na ki shnong ha ka thaiñ Jashiar, South West Khasi Hills District.
La sdang ïa ka jinglehniam da ka jingtyrwa ïa ka jingkñia Mass Bakhuid da u Most Rev. Wilbert Marweiñ u Lyngdohsad ka Jyllaniam Nongstoiñ, ryngkat ka jingïadonlang u Fr. Anselm Nonglang, u Fr. Sylvester Nongsiej Parish Priest ka Mawthong Parish, bad ki paid riewngeit jong ka Balang Katholik kiba la wan ban sakhi lang ïa katei ka sngi ba kyrpang jong ki kynthei, na ki parish bapher bapher.
Ha katei ka sngi la ïadonlang ruh kiwei kiwei ki Lyngdoh, ki sister, ki brother, u Fr. Eugene Thyrniang uba dei u Spiritual Director jong ka Synjuk ki Kynthei Katholik Jylla Niam Nongstoiñ, ka kong Dorabel Kharkongor President ka Synjuk ki Kynthei Katholik Jylla niam Nongstoiñ, ka kong Memorial Syiemsad General Secretary ka Synjuk bad kiwei kiwei.
Ha ka jingïaseng nohphai sngi pat shuwa ban pyndep ïa ïa ka jingmane Sakrament Bakhuid u Fr. Remiky Niangti uba la wan kum u Resource person ha ka jingïalang ka Synjuk, u la ïoh ban sam ïa ka jingai jingmut lem sha ki longkmie ban puson ïa ka Ktien U Blei da kaba u la pynkynmaw ïa ka kmie u Samuel u nongïathuh lypa kaba ka Hannah, bad u la ong ka jingriewblei jong ka Hannah, ka jingïaineh jong ka ha ki jingduwai khlem da pud, ka jingïaishah ïa ka jingshah lehbeiñ ka pynlong ïa U Blei ba un ai u khun uba la dei syndon uwei na ki nongïathuh lypa uba khrawbha ha ki por jong ka Jutang Barim, kumta ka jingstad jong ka longkmie ban sharai ïa la ki khun ka dei tang ka jingduwai, namar kata to long phi ki longkmie kiba duwai, ong u Lyngdoh.