Ka jingshna ïa ka surok na Umtyra-Lubang kan kyntiew ïa ka ïoh ka kot ki riewlum ka Megh-Assam

Shillong, ïaïong, 19: Ka North East MP’s Forum ka la phah da ka jingthoh sha u Myntri Rangbahduh ka ri India u Narendra Modi ban pan jingkyrshan ha kaba ïadei bad ka jingshna noh ïa ka surok Umtyra-Semasi-Nohkhara-Lubang bad ka jingshna ïa ka jingkieng ha Wah Kupli ka ban kyntiew ïa ka khih ka kamai jong ki riewlum kiba sah ha ka jylla Meghalaya bad ha ka jylla Assam.
“Nga pan ïa ka jingkyrshan jong phi ban pynsdang noh ïa ka projek ka ban pynïasnoh ïa ka surok Umtyra-Semasi ha East Jaiñtia Hills, Meghalaya haduh Lubang ha Karbi Anglong Assam lyngba ka surok kaba jrong 40 kilomitar bad ka jingkieng ha Wah Kupli. Kane ka projek kan pynïasoh ïa ki paidbah jong ki ar tylli ki jylla, ka kyntiew ïa ka khaii ka pateng ha kane ka thaiñ, bad kan pynïasoh ïa ka surokbah National Highway-6 bad No-127,” la pynpaw u Secretary General ka NEMPF u Bah Vincent H. Pala ha ka jingthoh ba la phah sha u Myntri Rangbahduh ka ri ha ka sngi Balang.
“Kumba phi tip, ka aiom lyiur ha NH-6, Sonapur ka la wanrah ïa ka jingtwa khyndew kaba la ktah ïa ka leit ka wan ha kane ka thaiñ. Ka jingtyrwa ban shna ïa ka surok bad ïa ka jingkieng kan ïarap ïa ki paidbah ha Barrak Valley, Mizoram, Tripura bad Nagaland ban ïaid da ka jingsuk ha kum kane ka por. Kum ban shu bynrap, kan pynsuk shikatdei eh ha ka rah ka rong kum ha ka jingkit ïa u dewiong, u mawshun, ki dieng lymbong, namarkata kan kyntiew ïa ka khih ka kamai jong ki riewlum ka jylla Meghalaya bad Assa. Ka surok kan pynïasoh bad ka Karbi Anglong District bad ka Land Customs Station bad ka Bangladesh lyngba ka Meghalaya,” ong u Bah Pala.
“Ka jingtyrwa ban shna ïa ka surok Umtyra-Semasi ha East Jaiñtia Hills, Meghalaya sha Lubang Karbi Anglong District Assam ym tang ba kan pynmyntoi ïa ka jingkiew ha ka ïoh ka kot hynrei kan kyntiew ruh wat ïa ki kam jngohhkai pyrthei ha ki shnong ba la sah da ki riewlum jong ka East Jaintia Hills bad ka Karbi Anglong District, kiba don ïa ki kshaid ba pawnam,” la pynpaw u Bah Pala.
“Shuh shuh, kane ka projek kan pynmih ruh ïa ki lad ïohkam na ka bynta ki samla jong kine ki ar tylli ki jylla bad kan wanrah ruh ïa ka jingïasngew shipara hapdeng ki jaidbynriew bapher bapher. Kane ka surok, ka pynduna ruh ïa ka jingïaid lynti haduh 130 kilomitar na ka bynta ki nongleit nongwan, kan kyntiew ïa ka jingpynïasoh ïa ki surok bad kan pynsuk shikatdei eh ïa ki paidbah jong kine ki ar tylli ki jylla,,” la bynrap u Bah Pala.
“Nga kyrpad ïa ka ophis jong phi ban bthah ïa ka Ministry ban pynkhreh ïa ka DPR bad ban buh hakhmat eh ïa kane ka projek ha kaba saindur bad ka jingpyntreikam na ka National Highway Fund, namrba kan pynïasoh ïa ki surokbah bad ïa ki ar tylli ki jylla bad kumjuh ruh ïa ka khappud na ka bynta ka khaii ka pateng,” la pynpaw shuh shuh u Bah Pala.