Shillong, Naitung, 14: ka Khasi Jaiñtia Church Leaders’ Forum (KJCLF) ha ka sngi Thohdieng ka la ong ba ka jingpyntreikam ïa ka Uniform Civil Code (UCC) kan lam sha ka jingshah rat dyngkhong jong ka dustur ai jait kmie jong ka jaidbynriew Khasi.
Ha u kyrwoh, u Secretary jong ka Forum u Rev. (Dr.) Edwin H. Kharkongor u la ong, baroh ki kynhun jaidbynriew bad ki niam tynrai ki don la ki jong ki jingmut jong ki ban pdiang bad ban leh ha kaba ïadei bad ka shongkha shongman, ka pyllait san shyieng, ka jingïoh bhah bad kiwei kiwei, katba katto katne ki jaidbynriew ki don la ki jong ki jingïapher.
“Namarkata, kam long kaba dei ban shu pyntreikam ïa ka Uniform Civil Code ha baroh kawei ka ri,” la ong u Rev. Kharkongor.
“Ha ki jaidbynriew Khasi jong ka Meghalaya, kan long kaba ma shikatdei eh, namar ha ka jingaijait bad ka riti ka dustur lada pyntreikam ïa ka Uniform Civil Code kan wanrah jinglyngngoh bad kan pyndam syndon ïa ka jingai jait kmie hapdeng ki Khasi,”u la bynrap.
“Ïa mynta, ban peit katkum ba ka 21st Law Commission of India dang shen ka la ong ba ka Uniform Civil Code (UCC) “kam pat da donkam than lane kaba la kwah lang da baroh ha kum kane ka por,” u la ong, bad bynrap, ban pynïaid beit shakhmat ïa ka jingpyntreikam ïa ka UCC pyrshah ïa ka mon jong ki paidbah ha ka ri, kan pynpaw ïa ka jinglong amriang bad ka jingbym pyrkhat bha jong ka Sorkar kaba bat mynta ïa u lakam synshar.
