Ka jingpyntrei ïa ka Smart City Project ka la ïaid shakhmat ong u ma Sniawbha
![](https://mawphor.com/wp-content/uploads/2023/04/Sniawbhalang-500x430.jpg)
Shillong , Risaw 05: U Symbud Myntri Rangbah ka jylla u Ma Sniawbhalang Dhar uba khmih ruh ïa ka tnad Pynroi Sor, hynne ka sngi Palei, ula ïathuh ba ka jingpyntrei ïa ka Smart City Project ka la ïaid bha shakhmat hapoh ka Jylla.
U Ma Sniawbhalang Dhar ula ong ba ka Smart City Project kaba kynthup ïa ki 17 projects ka la ïaid shaid shaid bha bad ha kaba ïadei bad ka Integrated Command and Control Centre (ICCC) dei ban pyndep noh hapoh jong u Lber 2024.
Ula ong, shisien ba la pyndep ïa katei ka project, yn sa sdang noh ïa ka jingpyntreikam.
“ïa kiwei pat ki projek ngi dei ban lah ban pyndep noh hapoh u bnai Jylliew 2024 bad mynta hi ngi dang pyrshang katba lah ban leh ïa kane. Ki katto katne ki projek lyngba ka Smart City Project ki kynthup ïa ka ïew Laitumkhrah, ïew Polo, ki Parking Lot kiba heh, Smart Road bad kiwei kiwei bad baroh ki long 17 tylli ki project” ong u Ma Sniawbha.
Ha kaba ïadei bad ka jingdheng kali, u Symbud Myntri Rangbah ula ong, shisien ba la dep ban pynkynriah ïa ka Main Secretariat sha New Shillong Township, ka ban shim por sa kumba 2-3 snem, kan sa ïarap shibun ban pynduna ïa ka jingdheng kali.
“Ka jingpyntreikam da ka ‘Odd bad Even’ ïa ka jingpynïaid ïa ki kali ka la long ka jingeh, Ngi hap ban sngap ïa ka sur bad jingpynsngew jong ki paidbah, hynrei ngi dang ïaid ha katei ka bynta bad dang shen ngi la shong jingïalang bad ka Deputy Commissioner ruh,” ong u Ma Sniawbha.
Ula ong, shisien ba la dep ban tei ïa ki jaka pynieng kali ne Parking Lot, la khmih lynti ba kin pynduna khyndiat ïa ka jingdheng kali khamtam haba bun ki paidbah ki ju pynïeng ïa ki kali ha kat kaba lap ba shem ha ki bynta jong ki surok.
Haba kylli la ka sorkar jylla ka don jingthmu ban ai jingïarap pisa ïa ki riewshimet kiba thmu ban tei ïa ki Parking Lot ha ki jaka ki jongki kiba don ha nongbah Shillong, u Symbud Myntri Rangbah ula ong, ba kam shym la don kano kano ka polisi treikam halor kane ka bynta hynrei ka sorkar ka lah ban khmih bniah bad ban phaikhmat ïa kane ka bynta.