Ka jingpynlip bording ka dei namar ba dang pyntreikam ïa ka RDSS bad kam pynpoi bording sha ïingbriew

Shillong, Jymmang 29: U Myntri ka Tnad Bording u Bah Metbah Lyngdoh ha ka Sngi Thohdieng, ula pynpaw ba ka jingpynlip bording elektrik ha ki katto katne ki bynta jong ka jylla ka dei namar kiba bun ki daw kynthup ka jingpyntrei kam ïa ki skhim Revamped Distribution Sector Scheme (RDSS) bad ki kam ha ka ban pynpoi ïa ka bording elektrik sha ki ïing ki sem.
Ula ong ba kine ki jingpynlip ïa ka bording ki dei ki bym lah kiar na ka bynta ban pyndep ïa kitei ki projek. “Ki bun kiei kiei kiba la jia, kumta phin sa ïohi ïa ka jingbun ïa ka jingpynlip ïa ka bording elektrik hangne hangtai namar ba ki skhim bapher bapher ki dang ïaid shakhmat, kum ka RDSS bad kiwei kiwei, ryngkat bad ka jingpynpoi shuh shuh ïa ki bording elektrik sha ki ïing ki sem” ong u Bah Lyngdoh haba ïakren bad ki nongthoh khubor.
Ula ong, ba ka jingpynlip bording ka long kaba donkam namar ban pynthikna ïa ka jingshngaiñ ïa kiba trei ïa katei ka kam. “Kumta namar kitei ki kam, ngi hap ban pynlip ïa ka bording, na ka bynta katto katne por, ngin ym lah ban trei ïa ki kam ki jam lym da ngi pynlip shwa ïa ka bording elektrik” ula ong.
U Myntri ula ong, ba la dep ruh ban ai lypa ïa ki jingtip sha ki bor pynïaid shnong. “Ia ki jingtip lah ai sha ki Dorbar Shnong jong ki jaka ki ban shah ktah ryngkat bad ïa ka por jong ka jingpynlip ïa ka bording bad la ai notis lypa khnang ba kin tip lypa shaphang katei ka jingpynlip ïa ka bording” ong u Bah Lyngdoh.
Ka RDSS, ka dei ka skhim kaba la bei da ka Sorkar Pdeng da ka jingthmu ban pynbha ïa ka rukom ai jingshakri kaba ryntih bad ka jingpynneh ïa ka ïoh ka kot jong ka rukom sam ki kompani ïa ka bording lyngba ki jingtei kiba la dep ban kyntiew kyrdan bad ki smart meter.
Kane ka jingkren u Bah Lyngdoh ka la wan hadien ba ka la don ka jingujor jong ki paidbah halor ka jingbym pynthikna ïa ka por bad ka jinglip khah khah ka bording elektrik ha kylleng ki jaka bad ha kylleng ki district.