ïashimbynta u Kartikeya Vajpai ha ka jingïakren halor ka thoh ka tar ha Shillong

Shillong, Jymmang 29 : Ha lyndet ka jinglong ba riewspah jong ka jylla Meghalaya ha ka liang ka jingshemphang bad ka riti dustur, u nongthoh kot, u nongïasaid aiñ bad u nongkren u Kartikeya Vajpai ha ka sngi Palei u la wanrah ha Shillong ïa ka kot kaba la paw bha jong u kaba la ai kyrteng’ The Unbecoming: Let Life Reveal Its Purpose’, ban ïakren bad phylliew jingmut bad ki ‘riew thoh kot jong ka nongbah ha Shillong Press Club.
Ha kane ka jingïalang, la don ka jingïakren hapdeng u Vajpai bad ka nongïoh khusnam Padma Shri, kaba long ruh ka Editor jong ka kotkhubor The Shillong Times, ka Kong Patricia Mukhim. Kane ka jingïalang ka la khring ïa bun ngut ki nongpule kot, ki nongthohkhubor, ki nonghikai, ki samla pule bad ki riewshemphang, kaba la long ruh ka janmiet jong ka jingpynleit jingmut halor ka snap, ka jingthmu, ka jinglong ba bha jong ka jingsngew bad ka jingwad ïa ka jingmut jong ka jingim ba mynta.
Kane ka kot The Unbecoming ba la pynmih da ka Penguin Random House India, ka la ïoh ïa ka jingphai khmat na kylleng ka ri na ka bynta ki saiñpyrkhat ha kajuh ka por ka jinglah jong ka ban ngam jylliew ïa ka jingangnud, ka jingsheptieng, ka jingpynbeit bad ka jingtip ïïalade.
Ka don ruh ha ka ïa ki ‘tien lamphrang na u Dalai Lama bad u Swami Sarvapriyananda, kane ka kot ka batai shaphang ka jingïaid lynti jong ka jingsngew bad ka jingmut jingpyrkhat jong u Siddhart, uba long u nongïalehkai kriket, bad u Ajay uba long u nonghikai uba la pyntbit ïa u, baroh ar ngut kine ki nongïashimbynta ki wanrah ïa ki jingkylli ba jylliew halor ka snap, ka jingkhmih lynti, bad ka jingpynkylla dur ba shapoh.
Ha ka jingïakren, u Kartikeya u la kren halor ka jingpang bad jingkhuslai mynsiem bad ka jingdon jong ka jingklumar jingmut kaba jur bha hapdeng ki samla ka juk mynta, ha ka pyrthei kaba la synshar da ka jingïapyni bad ka jingïanujor. “Ngi im ha kine ki snem ba ki briew ki ïaleh ban pyni sha ka pyrthei, hynrei kham bunsien, khlem sngewthuh bha ïalade.
Kaba sngewsih kam dei ka jingshah jop – hynrei kaba im ïa ka jingim ka bym don jingïasnoh bad ka sur ba na shapoh jong phi”, u la ong. Haba kren shaphang ka nongbah Shillong bad ka Meghalaya, u Kartiyeka u la ong ba ka Meghalaya ka dei kawei na ki jaka kaba don ia ka jingsngew bad ka jinglong mynsiem kaba itynnad ha ka ri na ka bynta ki jingïakren ba pynphalang jingmut. U la ong ba kane ka jaka ka don ïa ka jingsngew bad ka jingshemphang ba niar bad ba jylliew kaba ai mynsiem ïa ka jingïit ïalade, ka thoh ka tar, bad ka jingïadei ba don jingmut para briew. “Ki jaka kum ka Meghalaya ka pynkynmaw ïa ngi ïa ka jingjar jar, ka jingshoh jingmut bad ka jingjylliew ki dang long kiba kongsan. Ka don ka jingsngew basngur hangne kaba pynlong ïa kane ka jingïakren kaba don jingmut haduh katta katta,” u la ong.
Ka jingïakren bad I Kong Patricia Mukhim, ka la wanrah ïa ka jingïaphylliew jingmut ba ïar ha ka thoh ka tar, ki jinglynga mynsiem ha kane ka juk mynta, ka snap, ki samla bad ka jingdonkam ban thaw ïa ka rynsan paidbah ha kine ki por jong ka juk ba bunkam sha ba palat. Haba kren ha kane ka jingïalang, ka Kong Patricia ka la ong, “Ngi im ha kane ka pyrthei ba kynrum kynram, ngi shah lynshop ha ki jingeh ha ka koit ka khiah jong ka bor pyrkhat- pyrdaiñ bad nga sngew ba kum kane ka kot ka long kaba donkam bha ïa kane ka por.” Haba sngap ïa ka jingkren jong u, ka la ong ba u long shisha ‘u nongkren ba ai mynsiem’.
Ki dkhot jong ka thoh ka tar bad ka pule puthi jong ka nongbah Shillong, ki la ong ba kane ka jingïakren ka long kaba kit jingmut, ba pynim mynsiem bad kaba pynthymmai ïa ki jingmut jingpyrkhat. Bun na ki nongwan ki la ai jingïaroh ïa ka jingwanrah ïa kane ka kot ha Meghalaya, da kaba ong ba ki phang pdeng ha kane ka kot The Unbecoming ka ïadei bha bad ka jinglong jong ka riti dustur hangne bad ka jinglong ki samla mynta..
ïa kane ka jingïalang la pynkut da ka jingïaphylliew jingmut hapdeng u nongthoh bad ki nongwan bad ka jingsoi ïa ki kot, ha kajuh ka por ki nongpule kot ki la ïohlad bad ïïa kren bad u u Vajpai halor ki phang jong ka jingthmu, ka jinglah ban ïakhun ha ka jingsngew, ka jingïapher, ki jingïadei, ka jingangnud, bad ka jingwad bniah ïa ka jingmut kaba kham jylliew ha ka jingim mynta.