Ka jingpynïakhun ka NPP da ki kynthei kam dei ka jingthmu pynkupbor ïa ki kynthei : Vincent

Shillong, Lber 17: U nongïalam ka liang pyrshah bad u President ka Congress uba long u MP na Shillong u Bah Vincent H Pala u la ong ba ka seng kaba la synshar ïa ka sorkar jylla ka National People’s Party (NPP) ka la rai ban pynïeng da ka kynthei na baroh artylli ki ki kongstituensi na Tura bad Shillong kam shym dei kata kaba la pynkupbor ïa ki kynthei hynrei namarba kim don shuh da kawei lad.
U Bah Pala u la ong ba ka Congress ka la leh khambha ban ïa kino kino ki party haba kren shaphang ka jingai bor ïa ki kynthei. U la ong ba ïa ka women reservation policy la sdang da ka Congress bad ym da kiwei ki party.
“Da kaba shu phah pynïeng da ki longkmie kum ki kyrtong na baroh artylli ki konstituensi nga tharai ba ka NPP kam don shuh da kawei ka lad naba ym don kiwei pat kiba la khreh ban ïakhun na Shillong. Ki hap ban ïoh da kiwei. Ki hap ban pynkylla ïa ki kyrteng jong ki kyrtong la palat 2 sien kumta nga tharai kam dei kaba la thmu ban pynkup bor ïa ki kynthei hynrei ba kam don da kawei pat ka lad,” u la ong.
“Ka Agatha ka dei ka MP kaba mynta kumta ki khlem ai sha ka kynthei bad ki la dep ai lypa ïa ka mynshwa. Kumta phi peit ha kata ka laiñ ka Congress ka kham long ka seng kaba khambun ban pynkup bor ïa ki kynthei ban ïa kino kino ki party,” ong u Bah Pala.
Lah ban pynkynmaw hangne ba ka NPP ka la pynïakhun da ka myntri sorkar bad ka MLA napoh ka East Shillong ka kong Ampareen Lyngdoh na Shillong parliamentary seat.