Shillong, Nailur 28: Ka North-Eastern Hill University (NEHU), ha ka jingïatreilang bad ka Raj Bhavan, Meghalaya, ka la pynlong ïa ka Workshop kaba shisngi halor ka Drug Abuse ha Raj Bhavan. ïa kane ka workshop, ka long kaba kongsan na ka bynta ban peit ïa ka jingkiew jong ka jingpyndonkam bakla ïa u drok ha Meghalaya. ïa kane ka Workshop la plie da u Lat ka jylla uba la long ruh kum u kongsan. Ha kane ka workshop lah don ki nongïalam bapher kiba kynthup naduh ki riewshemphang ba kynthup ïa ki samla pule ka NEHU bad kiwei kiwei.
Ha ka jingkren jong u, u la pynpaw ïa ka jingsngewkhia halor ka jingkiew sted kiba dih drok da kaba ong, “ka jingpyndonkam bakla ïa u drok ka long kum ka khlam kaba jar jar kaba rung ha ka jingim jong ki riew shimet, ki longïing longsem, ka imlang sahlang bad kaba pynjot ruh ïa ka jingim jong ki briew.” U la banjur halor ka jingma kaba mih na u drok da kaba ong ba kadei kaba ktah ïa ka shongsuk shongsaiñ ruh kumjuh, ïa ki samla jong ka Meghalaya.
U la ong ba ka donkam ka jingïatreilang jong baroh ba kynthup ïa ki shnat sorkar, ka aiñ, ki nongai jingsumar, ka imlang sahlang ban ïakhun pyrshah ïa u drok.
Katba na ka liang u Vice-Chancellor ka NEHU, u Prof. Prabha Shankar Shukla, haba kren u la banjur halor ka jingktah jong u drok ïa ka jytlla bad khamtam ïa ki samla. “Kane ka workshop ka long kaba kongsan naba ha kine ki sngi ka la kiew palat kiba pyndonkam ïa u drok,” u la ong da kaba bynrap ban ïakhun ïa une u jingdih uba ktah ïa ka imalang sahlang ka long ka bynta kaba hap ban shimkhia lang da baroh. U la pynpaw ka jingïaroh ïa ki riew shemphang ba ki sam lem ïa ki jingtip haba ïadei bad ka jingpyndonkam ïa u drok ha kaba kane kan long ka jingmyntoi ïa ki samla pule bad ki samla hi baroh jong ka jylla.
Ha kane ka sngi la wan ban ai jingkren da u Bah Michael Syngkon, na Manbha Foundation, kiba la sam ïa kiba bun ki jingkren ha kaba ïadei bad u drok bad khamtam halor ka jinglong kongsan ki jaka sumar ïa kiba la shah ktah ha u drok.
Na ka liang u P. Sampat, Principal Secretary, Department ka Social Welfare, u la ïathuh halor ka jingpyrshang jong ka jylla ban ïakhun bad ïaleh pyrshah ïa ka jingpyndonkam bakla ïa u drok.
