Naduh ba sdang ïakhun pyrshah ïa u drok ka seng ka la phah sumar 120 ngut, ong ka HYC

Shillong, Nailur 28: Naduh ba ka seng HYC sengkmie ka la sdang ïa ka kam ban ïakhun pyrshah ïa ka jingjyllei jong u drok ha ka jylla ha ka 2 tarik u Jymmang 2024, ka HYC ka la lah ban phah sumar haduh 120 ngut kiba la ngop ha une u jingdih ba pynbuaid ha ka jylla sha ki Rehabilation Centre bapher bapher ka nongbah.
Ïa kane la ong da u President ka sengkmie u Bah Roy Kupar Synrem haba ïathuh ha ka jingïalang kaba la long ha Khasi National Dorbar Hall ha ka sngi Saitjaiñ kaba dei ka prokram ïamir jingmut hapdeng ki nongïalam shnong, seng longkmie, seng samla bad kiwei kiwei.
U la ong ba ka sorkar ka la ïathuh ba ki don haduh 3 lak ngut kiba la ngop ha ka jingdih ïa u drok hynrei ki jaka sumar ki don tang 10 haduh 11 tylli kiba lah ban ai ka jingsumar tang ïa kumba 300 ngut kiba la dih drok bad ka jingleit sumar ruh ha ki Rehabilation Centre ka long kaba rem kaba ym duna ïa ka T. 10 hajar.
Na ka liang kiwei pat ki nongkren kiba la ai jingmut ha kane ka jingïalang ki la pynpaw ruh ïa ka jingsngewkhia ba bun na ki nongkhaïi kiba la shah kem lah bunsien hynrei tang katto katne sngi ki la laitnoh bad ki la pynpaw ruh ka jinglyngngoh ba hadien ba la ïoh kem ïa u drok ba la shongdor da ki spah klur shano ka sorkar ka buh naba ym ïohi ba kin thang bad ki la buh ka jingkylli ba hato la pyndonkam biang ïa une u juh u drok ba la ïohkem.
Ki nongkren ki la ai jingmut ba kadei ban don ka jingïada ïa kito kiba ym pat ngop bad ban sumar ruh ïa kito kiba lah ngaop bad ha kajuh ka por ban pynthikna pat ba ka jingïadie ïathied kan ym dei pat kan long kaba suk.
Kiba bun ki la ong ba ka dei ban don ka jingtalasi kaba khlaiñ bha na kito ki jaka ba une u drok u wan sha kane ka jylla, kum na Myanmar, na Manipur bad kiwei kiwei kiba la kit lyngba ki surokbah.