Ka long kaei kaei kaba ym lah ban shemphang ïa ka jingher stet jong ka por ha kine ki sngi kiba mynta. Don ki briew kiba ong ba imat ka shi sngi kam dei shuh 24 kynta kumba ju long. Katba nangmih ki sngi ka por ka phet stet bad ym lah sngewthuh bun ki sngew ba kim pat lah ban pyndep kam ei ei, hynrei ka taïew ka la kut, u bnai u la kylla bad ka snem kane ka la hakhmut. Ka shi bnai ka long kum ka shi taïew bad ka shi snem ka long kum ka shi bnai, kane ka dei ka jingmad jong kiba bun ha kine ki sngi kiba mynta. Tang ki khynnah skul kiba sngew ba ka por ka long kaba jlan namar ba ki hap ban ap ïa ki snem ban pyndep ia ki jingpule jong ki bad ba ki hap ban durïap ïa ka jingpule bad pyndep ïa ki eksamin jong ki. Mynnor ki riew shemphang ki la buh beit ïa ki sngi naduh ka sngi nyngkong, sngi ba ar, sngi Balang, Sngi Palei, Sngi thoh dieng, sngi Saitjaiñ bad sngi U Blei.
Kitei ki jingbuh sngi shisha ki long kiba maïan ban pyrkhat ha kine ki por ba mynta namar ba kam ju don shuh kum kitei ki sngi lait ha ki thaiñ nongkyndong. Namar ka jingïabeh than sha ka jingkhuid hadien ba ki briew ki la kham riew spah bad ki bit ki biang man ka sngi ka dei ka sngi saitjaiñ bad kumjuh ruh ka sngi kamai bad ka sngi leh sngewbha. Jan baroh ki ud ba ka por ka la stet bad kim sngewthuh shuh kumno ki sngi ki por ki tyllun.Ym lah ban len ba kine baroh ki jia dei na ka jingkylla jong ka por bad ka jingiabeh palat jong baroh sha ka jingim kaba kham bit khambiang bad kaba lah ban ong ka jingïabeh spah bad ka sngew tohmet ban ong kumta.
Kine ki dei ki sngi kiba ki briew ki ieit palat ïalade bad tang ïa la ki jong, kham ñiar ban don kiba pyrkhat na ka bynta kiwei pat. Ki shisha ki sngi kiba ka jingstad ka roi (Daniel 12:4) bad bun na ngi ngim don por shuh ban im kum kitei ki sngi, ym don sngi briew ym don sngi blei shuh. Ka long kaba shisha kumba kiba bun ki ong ba ka por ka la her stet palat. Ka jingïabeh sha ka jingim kaba riewspah ka long kaba ima bad kaba i duh jingkyrnem pynban. Itynad ban ïohi ba ki briew ki riam stai bad ki beh sha ki ïing mane ban shakri Blei ha kum kane ka sngi Blei, hynrei katno na ngi, ngi leit shisha da ka dnhnud ban shakri ïa U Blei ne ngi leit ban pyni ïa ki jingdon riam, jingdon kali bad burom briew la jong. Bun ki riew shakri Blei ki ud ba ka jingieit ka la duna palat hapdeng jong ki para briew ha kine ki sngi wat hapdeng ki Khristan ruh hato ka long shisha kumta?
Ka jubab halor katei ka phang ka don ha baroh kito kiba ieit ban shakri Blei kumno ki long ki man, ka ïing bishar kaba khraw tam ka don ha ka dohnud jong baroh kito kiba dang don ka jingïatip lem. Kito kiba la eh dohnud bad kiba ieit tang ïalade bad la ki jong, kim don jaka hi ïa ka jingieit. Haba ïa nujor ïa ka jingieit, ka jingkyrmen bad ka jingngeit, u Apostle Paul u ong ba ka jingieit ka dei kaba halor tam, namar ba ha kaba kut dei tang ka jingieit kaba ïai neh sha ki bymjukut. Ki khmat jong ki briew kiba ka dohnud jong ki ka dap da ka jingieit ki peit ïa ki jingtlot jong kiwei bad ki iohi ia ka jingkyrmen ha ki, hynrei ha kito kiba ka jingieit ka la man khriat haba peit ia ka jingtlot jong kiwei ki ïohi ia ka jingjot bad ka jingbymdon jingkyrmen.
Sngewtynnad ban dang ïoh sngew ba don kiba ong ba ka Meghalaya ka dei ka jylla jong ki Khristan ne ka Christian State. Ka long kaba sngewkmen ba kawei na ki sngi ba la buh beit da ki mynnoh kata ka sngi U Blei ka dang long hi ka sngi kaba ki baje ïing mane ki riew bad ki riewngiet ki leit sha ki Jingïaseng. Ka long shisha kaba i don jingkyrmen lada ki briew kiba shakri ïa U Blei kin dang ïai bteng ban ïai duwai na ka bynta ka ri bad ka jaidbynriew wat hapdeng jong kiba kum kine ki sngi kiba ym i don por shuh ïa kiei kiei kiba bha. Ka sngi U Blei kawei na ki sngi jong ka taïew ha ba ki briew ki dang ïoh ia ka por ban shakri ïa la u Nongthaw ka long shisha kaba don jingmut bad kaba wanrah ïa ka jingkyrkhu. Ngim dei ban klet ba kane kam dei ka sngi ban pyni sarong bad ñiew bieñ ïa kiwei, hynrei khamtam ban long ka sngi kaba ngin kyrkhu ïa kiwei bad ïa U Blei Trai Kynrad U Nongbuh U Nongthaw.
