Mawkyrwat, ‘Naiwieng, 01: Ka ophis jong ka Deputy Commissioner, South West Khasi Hills District lyngba ka State Tuberculosis Officer, Shillong ka ai kane ka jingpyntip bad jingbna paidbah ha kaba ïa dei bad ka jingkyrpad ban ai jingkyrshan lane jingïarap mon sngewbha na ka bynta kito ki briew kiba ïoh ïa ka jingpang Tuberculosis (TB) katkum ka jinglah ne ka jingkot bor jong ki nongïarap.
Shuh shuh ka Deputy Commissioner ka pyntip ruh ba ka Ministry of Health & Family Welfare (MoH&FW) kaba hapoh ka National Tuberculosis Elimination Programme (NTEP) ka la thaw ïa ka ‘Community Support Initiative’ ha kaba ki briew kiba don ka mon sngewbha ban ïarap ïa ki nongpang TB la ka long da kaba ïarap da ki jingbam ba tei ïa ka met, ban siew lem ïa ki bai test, ban pynbiang lem ïa ki dawai kiba khlem kynthup ha kane ka prokram, ka jingïarap ban siew ïa ka bai leit bai wan jong ki nongpang ha ka por ba ki leit phah sumar ne check-up lane ha ka por ba leit ai jinghikai na ka bynta kito ki nongpang TB.
Ka la pyntip ruh ba la don kino kino kiba kwah ban ai jingïarap ne jingkyrshan da ka mon sngewbha na ka bynta kine ki nongpang kin hap ban ïarap siew T. 1000/- shi bnai na ka bynta uwei u nongpang bad ïa ka kyrteng jong ki yn pynrung ha ka ‘NIKSHAY Apps’ kum ka ‘NIKSHAY MITRA’. Ha kajuh ka por la kyrpad ruh ïa ki nongïarap mon sngewbha ba lada ki lah ban ïarap ym tang na ka bynta uwei u nongpang hynrei ar lane lai ngut katba ki sngew kot bor.
Kumta, na ka liang ka ophis jong ka Deputy Commissioner, South West Khasi Hills District katno kan sngewkmen lada don kum kita ki briew ki ban mih shakhmat ha ka ban ïarap bad kyrshan mon sngewbha ïa ki nongpang TB na ka bynta ban lah ban pynbiang ïa ki jingdonkam jong ki bad ba ka sorkar kan lah ban pynduhjait ïa kane ka jingpang. Kino kino kiba don ka mon ban kyrshan bad ai jingïarap ki lah ban wad jingtip na ka District Tuberculosis Officer, West Khasi Hills District, Nongstoiñ ha u Whatsapp number: 8974604743 lane ha ka Email ID: dtomgwkh@rntcp.org.
