Ka jingkynrei u Drok ha ka Nongbah Shillong ka dei ka jinghiar thma ba jar jar ki mynder ïa ka jaidbynriew: FKJGP

Shillong, Naiwieng:“Ka jingkynrei u Drok ha ka Nongbah Shillong ka dei ka jinghiar thma ba jar jar jong ki mynder ïa ka jaidbynriew,” ong u Samla Kitboklang Nongphlang, Vice President ka Seng FKJGP Central Body haba kren ha ka jingïalang pynskhem nongkitkem hapdeng ki nongïalam ki Circle kiba don ha ka nongbah Shillong kaba la long ha ka 3 tarik mynta u bnai ha ka ophis treikam jong ka ha Mawlai Kynton Massar.
U la ong ruh ba kane ka la wan long namar kiba bun ki samla khasi kiba ngop ha utei u jingdih pynbuaid ki dei tang ki langkñia katba kiba pynpoi bad pynngop pat ïa utei u jingdih bunsien ki dei beit ki khyllah jait.U la ong ruh ba kum ki dkhot jong ka seng ki dei ban long kiba phikir, kiba peitngor bad ban long kiba la khreh ban iakhun pyrshah ïa ka Thma Drok kaba la bam kruiñ ïa ka jaidbynriew.
ïa kane ka jingïalang kaba kyrpang la pynlong hadien ka jingwan pynïasoh da ki spah ngut ki khun samla na ki bynta bapher bapher jong ka Nongbah Shillong. Ka Seng kala lum ïa kane ka jingïalang ban shim ïa ki sienjan ban pyn khlaiñ ïa ka rukom treikam jong ka seng khamtam eh ha ka nongbah Shillong.
ïa kane ka jingïalang la pynïaid da u bah Khrawkupar Nongsiej, Chief Organising Secy FKJGP Central Body ha kaba la ïa don ryngkat ruh da u khlieh nongïalam jong ka seng u Bah Dundee Cliff Khongsit, President, Senior Vice President bah Elton Cliff Warjri, Samla Kitboklang Nongphlang, Vice President bad U Bah Eldie N Lyngdoh, General Secretary.
Katba u Bah Elton Cliff Warjri, Senior Vice President ha ka jingkren u la pynkynmaw ïa ki lynti ïaid jong ka seng ha ki snem 2014 ter ter ha kaba ki dkhot ki dei ban don ïa ka mynsiem kaba shitrhem ban shakri ïa ka jaidbynriew hi baroh kawei.
U Bah Eldie N Lyngdoh, General Secretary Central Body uba la long teng ruh u Genl.Secy FKJGP Shillong City ha u snem 2024 u la pynkynmaw ba ki dkhot jong ka Shillong City ha kitei ki snem kila mad ïa shibun ki jingshah tynjuh lyngba ki jingshah kem, shah bom shah tied haba ki pyrshang ban ïakhun ïa kiba bun ki mat ne issue na ka bynta ka dawbah jong ka jaidbynriew hynrei kaba sngewtynnad pat ka long ba haduh mynta ka nongrim ka skhem bad kam lah satia ban theh umpjah ïa ka mynsiem ieit ri ha kaba u la kyntu ruh ïa ki dkhot ba kin nang ïai trei shitrhem shuh shuh ban aiti met bad mynsiem na ka bynta ka jaidbynriew.
Hashwa ban pynskhem ïa ki nongkitkam ba thymmai jong ka FKJGP Shillong City na ka liang jong u Bah Dundee Cliff Khongsit, President FKJGP Sengkmie ula pynshai ia ki nongrim bad ïa ki mat treikam jong ka seng ha kaba u la long ruh ba shisien ba phi la pyniaisoh ïalade bad ka FKJGP to tip shai ba shiliang ka kjat kala dei ban don lypa ha ka along bad shiliang pat shabar, ha kaba ula kyntu ruh ba kum ki dkhot kidei ban don ïa ka mynsiem kaba shynrang ka bym tieng, bym khawpud bad ka mynsiem kaba ym pyndem satia ban ïakhun na ka bynta ka dawbah jong ka jaidbynriew ha kaba u la maham pat ba ki dkhot jong ka seng kim dei satia ban long ki khwan myntoi na ka bynta ka malade.
Ki nongïalam bad ki dkhot bala shah pyntian smai na ka bynta ka samoi treikam 2023-26 jong ka FKJGP Shillong City ki kynthup ia u President Arkinfield Khonglam, VP Simon Myrthong, GS Shane Nongrum, Jt Secy Wanpyndap Marbaniang, Asst. Genl Secy Kyrshan Syiemlieh, Org Secy Alfredy Kharbuli, Barilang Pyngrope, Donkupar Dympep bad Dapkmen Syiemiong, Info Secy Embhahlang Talang, Asst. info. Secy Sherborn Shabong, Edu. Secy Garry N. Thangkhiew, Asst. Edu. Boney Jyrwa, Socio & Cultural Secy Larikupar Lyngdoh, Asst. Socio & Cultural Bantei Nong khlaw, Sports Secy Donavan Pyngrope, Asst. Sports Batkupar Nongkhlaw, Disciplinary Secy Rist Thabah, Asst. Disciplinary Secy Kordor Lyngdoh, Environmental Secy Hopewell Kharkongor, Asst. Environmental Collin Trunia, Agriculture Secy Arban Katrai, Asst. Agri. Mark Wahlang.
Nalor jong kine ki nongkitkam la jied ruh ïa kiwei pat ki 36 ngut ki dkhot na kylleng ki jaka kiba hap ha Sor bad Khapsor kum ki dkhot sha ka Executive Committee jong ka FKJGP Shillong City.