Ka jingkylli ka mih ïa ki jingïada ki jingdon jingem ki shlem treikam ki kynhun bad seng treimon sngewbha: Congress

Shillong, Nailar 06: U General Secretary ka Seng Meghalaya Pradesh Congress Committee (MPCC) u Bah Manuel Badwar u la khot la wer ïa ki paidbah ban ïa shim bynta ha ka jingïaid paidbah kaba jai jai ka ban long ha ka 10 tarik mynta u bnai, 2026 ban pyrshah ïa ka jingpynkylla ka sorkar pdeng ïa ka Foreign Contribution Regulation Amendment Bill, 2026, bad kane ka jingïaid paidbah kan sdang na Fire Bridge sha Don Bosco Point Laitumkhrah ka ban sdang ruh ha ka por 11.00 baje mynstep.
Haba kren bad u nongthoh khubor u General Secretary u la khot la wer ïa ki nongïalam sengbhalang, ki kynhun niam, ki paidbah nongshong shnong, ki seng samla, ki seng longkmie bad baroh kiba sngewkhia halor ka Foreign Contribution (Regulation) Amendment Bill, 2026, ïa kaba la wanrah da ka Sorkar Pdeng ha ka jingïalam ka BJP.
Kane ka Bill ka la pynmih ïa ki jingsngewkhia namar ki jingktah kiba lah ban mih halor ki Balang, ki kynhun treimon sngewbha, ki jaka pule, ki hospital, ki jaka ri khunswet bad kiwei kiwei ki shlem treikam kiba la shakri ïa ki paidbah jong ka jylla da ki phew phew snem.
Katkum ki kyndon ba la tyrwa, ki jingdon jingem jong ki kynhun kiba la ïoh jingïarap lyngba ka Foreign Contribution, ki lah ban wan hapoh ka bor jong ka Designated Authority lada ïa ka FCRA Registration jong ki ym shym la pynthymmai, ka la kut noh, lane la kyntait ban pynthymmai.
Kane ka pynmih ïa ka jingkylli halor ka jingïada ïa ki jingdon jingem bad ki shlem treikam kiba la tei da ka jingaiti ban shakri ïa ki paidbah.
Kane kam dei tang ka mat jong kawei ka kynhun ne kawei ka niam hynrei ka ïadei bad ki hok paidbah, ka jinglaitluid ban ngeit niam, ka jingshakri mon sngewbha, bad ka jinglong laitluid jong ki shlem treikam kiba shakri ïa ka imlang sahlang.
Kumta halor kane ka MPCC ka kyrpad ïa baroh lang ban ïeng tylli lang ban pynpaw ïa ka jingsngew lyngba ka lynti bad ka riti synshar paidbah.
Ka MPCC ka khot ïa baroh ban wan ïashim bynta ha ka jingïakhih kaba jai-jai bad katkum ka rukom synshar paidbah ban pynpaw ïa ka jingpyrshah ïa ki kyndon kiba sngew ba ki lah ban ktah ïa ki hok bad ki shlem treikam kiba la shakri ïa u paidbah.
Kane ka jingïakhih kan long da kaba don-akor, kaba jai jai, khlem jingthombor bad kaba burom ïa ka jingsuk bad ka shongsuk shongsaiñ jong ka Jylla.
U Bah Badwar u la ïathuh ruh ba ïa kane ka jingthmu ban pynkylla bad ban wanrah ïa ka (FCRA) Foreign Contribution (Regulation) Amendment Bill, 2026 ka dei ruh kaba la lamkhmat naduh ka sengkmie na Delhi bad kumjuh ruh kaba la kren da u MP ka seng na Thiruvananthapuram ka jylla Kerala u Shashi Tharoor.