Ha kane ka juk mynta, ka jingïadei bad jingïajan ki khun bad ki kmie ki kpa ka la nang jngai nang jngai. Ym tang katta, hynrei ki jingïadei ka la nang sting bad nang hiar arsut hapdeng ki khun bad ki kmie ki kpa. Ki khun kim don por shuh ban ïa kren ïasyllok bad ki kmie ki kpa. Kumjuh ruh, ki kmie ki kpa ruh kim i don por shuh ban kren, ban sneng ban kraw ïa la ki khun lajong. Hateng hateng pat, i kumba ki khun ki synshar bad pynïaid ïa ki kmie ki kpa namarba ki kham sngew stad bad sngew shai ban ïa ki kmie ki kpa jong ki.
Haba bishar ïa kine baroh, la lap ba ka dei ka jingïohlad jong ki khun ban ktah ïa ka mobile phone ban pyndonkam ïa ka Internet kaba don lut katba kwah. Ka jingpyndonkam ïa ka internet ha kane ka juk kam long tang ïa kiba heh, hynrei wat ki khynnah rit ka la long kaba ima haduh katta katta. La i thik kumba ki briew ki la shah teh mraw ha ka mobile phone kaba pynap shrip da ka Internet. Lada khang Internet ka Sorkar ha ki por ba don ka jingïakhih paidbah, ka jingthnum ïa ka Sorkar ka la long ka bym kai shuh namarba ki paidbah kim ïoh pyndonkam ïa ka mobile phone ban peit ïa ki jingjia kiba wan lyngba ka Internet.
Kane ka long kaba bakla shibun bad ka lah ban ïalam bakla pynban sha ka jingma bad ka jingshyrkhei hadien habud lada aili than ïa ki khun ban bat ïa ki mobile phone ha ka rta kaba dang khynnah bad kaba dang rit.
Ka jingpyndonkam palat ïa ka mobile phone ha ki khynnah ka pynhiar dor ïa ka longbriew manbriew. Ki khun kim kheiñ briew shuh ïa ki kmie ki kpa namarba ki la shah teh mraw ha ka mobile phone kaba pynbyrngia ïa ki.
Ki khun ki dei ban kohnguh bad burom ïa la ki kmie ki kpa. Ki dei ma ki, ki nongbsa nong btiah, ki nongri nongsumar naduh dangrit bad ki nongpynheh pynsan bad pynnang pynstad ïa la ki khun. Ki kmie ki kpa, namarkata, ki long kum ki blei hakhmat ki khun.
Kaba pynsngewsih ïa la ki kmie ki kpa ka long kumba pynsngewsih ïa ki blei. Ym ju bit satia ban saitlah ne ban leh tam sneng ïa la ki kmie ki kpa. Ïa kiba saitlah bad haram ïa la ki kmie ki kpa,ka lawei jong kita ki khun kan long lypa kaba dum bad ba kordit shibun.
Ka phawer ka maham”kordit ïa ki khun kiba haram ïa la ki kmie ki kpa.” Lada ki kmie ki kpa ki ai mon palat ïa la ki khun ruh, kita ki khun kim ju long briew hadien habud. Ka phawer ka la maham lypa “ki khun ïoh mon kim ju long eiei.” Lada ki leh suk palat ruh, ka phawer ka la maham lypa, “don ka ma haba la than eh ka suk.” Lada ki tam sneng pat, ka ktien syllok pharshi ka maham “ki khun tam sneng ki dei ki nongshun ba sniew tam jong u briew.” Dei ban nang ban kohnguh khnang ba phin nang ban synshar hadien habud. Don bun ki khun kiba la shu kjit sah na ka kamai ka kajih ki kmie ki kpa wat hadien ba ki la san la rangbah. Kum kine ki jait khun ki ju khot kum ki “Ki khun jynreiñ” kiba mih na ka doh, ki dait ruh ïa ka juh ka doh. Ki khun jaipdeh pat kiba shu pan pisa sah na ki kmie ki pa haduh ba kin da kyrduh hi khait, ki ju ong “ki khun tham” mih na ka kmie, bam duh syndon ïa la ka kmie haduh ba kan da ïap. Don ruh ki “ki Khun kbeit-shapuloit”, ki khun kiba byrngem shoh bad byrngem dat ïa la ki kmie ki kpa haduh ba ki kmie ki kpa ki tieng kylla thot thot ïa la ki khun shwa ba kin rung ha ing. Bun ruh ki khun kiba leh bym salia bad bym ñiewkor bad ibein ïa la ki kmie ki kpa.
Kane ka rukom leh ki khun kumta ïa la ki kmie ki kpa ka la long lypa ka dak ka shin jong ka jinghiar dor ka akor ka burom jong ka longbriew manbriew na ing na sem. Lada ka akor ka burom ka la hiar lypa na ing,yn nai ïakren shuh shabar ha shnong ha thaw ne ha ka imlang ka sahlang namar ka ktien ki ‘riew stad ka ong ba “kiei kiei baroh ki sdang na ing”(charity begins at home).
Kumno ban saiñdur na ing na sem, kumno ban saiñdur ha ka kur ka jait bad ha shnong ha thaw namar ka sorkar kan nym lah ban leh ei ei khlem ka jingïatreilang ka iing ka sem, ka kur ka jait haduh ki shnong ki thaw. Wat ki Balang ne seng Niam ruh ki don ka bynta kaba khraw ban saiñdur ïa ka imlang sahlang kaba la sdang lyngkar bad sniewdur haduh katne ha kine ki por mynta.
